妹妹病倒了(4m)

幾日前承熹開始有少少鼻水同埋體溫偏高, 但又未去到發燒, 我不停叫承熹飲多啲水, 希望佢可以自己打勝仗

我係一個唔鐘意一有少少病就去睇醫生食藥既人

不過我都明白依家既菌好惡, 唔睇醫生可能會令病情更嚴重

最後我選擇攞返之前醫生開定俾承熹看門口既收鼻水藥俾佢食
 
希望可以及時止病!

不過可憐既妹妹又俾哥哥傳染, 前日一早開始發現妹妹鼻塞

今次唔敢怠慢, 即刻去睇醫生

我個家庭醫生好多時都話, 唔太嚴重就唔好食藥, 等佢自己打下仗先

今次佢又係咁講, 我就話: 唔好啦, 上次試過一次, 打唔贏不特止, 仲攪到咳同好多啖

醫生最後都係開左藥, 因為妹妹無發燒, 所以醫生順便幫佢打埋四個月大既疫苗



妹妹呀妹妹, 你仲乜同媽媽影相時個樣咁不耐煩既??

你知唔知媽媽好錫你架!!!!

妹妹應該都係鐘意自己一個影

個樣即時寬容返

個個見到妹妹都話佢好肥好好肉, 肥過承熹當年!

我睇返Record, 其實哥哥係肥啲, 不過哥哥出世時都重過妹妹, 所以肥過妹妹都係正常!

尋日同妹妹返健康院, 佢既體重有7.32KG(16磅)

估唔到妹妹一日四餐奶, 每餐6-7OZ都可以重咁好 (因為妹妹好懶訓, 加上我又懶, 所以佢食完八點半餐奶我就唔會再餵, 由佢訓到第二朝八點半)

初時仲怕一日食得四餐奶會唔夠磅, 依家我就可以放心晒!  感恩~

妹妹同哥哥一樣勁愛食手指, 一得閒就塞隻手入口

承熹由妹妹出世已經好鐘意抱妹妹, 成日都嚷住要抱, 但妹妹次次俾哥哥抱親都喊

依家大個女左, 終意知道哥哥錫佢, 平時見到哥哥行過都會笑, 上面張相仲笑得好得戚, 哈!

有一次去完朋友家聚會, 朋友幫我抱住妹妹, 佢講笑咁同承熹講: 我抱妹妹返屋企好唔好?

承熹: 唔好呀!!! (好認真咁講)
我: 俾妹妹跟姨姨返屋企一日呀, 遲啲再帶妹妹返黎好唔好?
承熹: 唔好呀!!! (好肉緊咁講)
我: 承熹係咪好鐘意妹妹? 唔捨得將妹妹俾姨姨呀?
承熹: 係呀!!

承熹, 如果你將來都一樣咁錫妹妹, 咁珍惜呢份兄妹情就好啦!

妹妹, 你都要一樣咁錫哥哥呀! 知道嗎~


*********************************************************************************************************************************************

打完針既妹妹有輕微低燒, 但好快就退左, 胃口同心情都正常

唯一嚴重左既係 ------- 更加懶訓!!!!!!  真係訓到過晒時間都唔識醒, 要摷醒佢食奶, 食完再訓過!
希望承熹同妹妹都快啲好返啦~