平易近人 (附楓糖戚風食譜)

好耐無做戚風蛋糕, 上星期把心一橫做左兩款味道

一款係楓糖味, 另一款係朱古力味

出黎既效果楓糖味略勝一籌, 可能水份夠多, 效果出黎真係好輕好鬆軟

好耐無用殖膠模做蛋糕, 之前嫌棄佢有少少難甩模, 因為有好多'粒'突紋較易甩得唔靚.  後來今次先發現, 原來將個蛋糕倒扣至完全放涼 (大約一小時) 先甩模, 反而甩得好靚, 唔會一岩一忽.. 哈!  下次我會醒目d唔好咁心急~

楓糖漿係用平時食pancake點既個種, 一般超級市場都有得買.. 除左戚風外, 楓糖用黎做包包都好唔錯架!

戚風蛋糕依然係最平易又近人, 食極唔厭啊!  

我聽日會後補楓糖戚風既食譜...

 

食譜:

材料:
蛋黃... 3個; 楓糖... 60g; 沙拉油... 40g; 牛奶... 30g; 白蘭地... 10g(我用威士己代替); 低筋麵粉... 70g; 泡打粉... 1.5g; 蛋白... 120g; 砂糖... 50g

預備
1. 牛奶, 沙拉油隔水加熱至人體體溫(約30-40度)
2. 將低粉, 泡打粉混合過篩2次 (使用前可再篩一次)
3. 焗爐預熱170

做法:
1. 將黃蛋打散, 加入楓糖攪拌到淡黃色
2. 牛奶, 沙拉油及白蘭地加入拌勻
3. 另將蛋白打至起泡, 分三次加入砂糖, 持繼打至起角
4. 將 3 既1/3蛋白霜加入 2 既麵糊中, 輕力攪勻後再加入1/2既粉類, 拌勻後再加1/3 蛋白霜,拌勻再加入餘下粉類, 重覆此步驟!
5. 將麵糊倒入模內, 略略整平表面, 輕敲模型消除氣孔
6. 放入焗爐以170度焗25分鐘, 完成立即取出倒扣, 待完全放涼先甩模

註: 蛋白一定要夠企身, 打至起勾不會向下彎! 蛋白與麵糊混合時唔好拌太耐, 否則會令空氣減少, 令蛋糕發得唔夠高兼唔軟熟!