泉章居

當我唔係杜拜既時候, 我既網誌似飲食網多過私人網誌

睇返由返黎第一日返香港到依家, 我大部份post既blog都係飲飲食食@outside為主....其實真係好手痕, 好想落街市買餸煮幾味,, 見到新鮮到不得了既食材, 好想下廚啊!!!

希望新屋快d裝修好, 我就可以泡製一餐俾我親愛既daddy食(因為佢到依家都唔信我識煮野, 哼!)

Happy Friday約左朋友去銅鑼灣泉章居晚餐, 我諗住港島區無乜人會唔識呢間食肆,,, 因為實在太出名, 而且好味又抵食, 每次都要大排長龍... 但唔知點解今次返黎去過兩次, 兩次都無以等咁多人,  唔通質素已經差左?

佢地provide三餸/五餸連例湯套餐(唔係好記得係咪得兩款套餐),, 真係好抵食, 而且份量都唔細架!!!!!

我地四個人, 叫三餸套餐, 另外加多碟餸&炸饅頭,, 例湯加40蚊轉冬瓜盅!

招牌"霸皇雞",,, 超讚!!!!!!!!! 比起我整個d,, 真係無得比,, 我最鐘意食雞外, 就係佢鋪面既蔥絲,, 好正好正~ (我諗就咁蔥絲撈飯/麵, 我都OK!!)

抵飲足料冬瓜盅,, 四個人, 每人至少飲到二至三碗,,, 夏天飲一流啊!

有男仔朋友, 所以叫左個梅菜扣肉,, 雖然我唔會食佢d肥膏,, 但肉個part真係炆得好淋, 梅菜撈飯絶配呢!! 大少肯定睇到流晒口水(Darling,,你返你再同你去食下.. 錫晒你)

我係杜拜無莧菜食, 所以去親邊間酒樓, 我必揀莧菜... 就咁蒜蓉炒都好好味!

茄子炆斑腩,,, 我不嬲對斑腩麻麻, 而且太飽啦, 呢樣無乜人吼,, 下次都係唔好叫!

炸饅頭 (必嗌),,, 一個字 --- 正!

免費奉送糖水

埋單每人百三蚊,, 仲有好多剩可以打包添啊!!! (眼濶肚窄, 唉~)

未試過既朋友, 呢到適合一家大細, 一大班人聚會食飯既好地方

**銅鑼灣軒尼詩道489號銅鑼灣廣場一期7-8樓 (2577 3833)
**旺角奶路臣街33號依利大廈 (2396 0672)