包拗頸!

今晚整左焗豬扒飯, 熱辣辣, 超正!!!!!!  平時好少做焗豬扒飯, 因為又要揼, 又要煎(豬扒), 又要炒(飯), 又要煮(汁), 實在麻煩... 

不過點麻煩都好, 今次一定要煮!!!!  原因只得一個 ----- 就係包拗頸!

話說好耐之前當我要買呢個玻璃兜時, 大少講左一句 : 又講兜? 屋企咪有囉, 買咁多有冇用架??

唔鐘意人地塞頭塞勢既我當時答佢: 我買親既野一定係有用, 唔好質疑我啦!!!

所以係大少未記得我未用呢個兜之前, 我要行先一步!!!  哈哈...

老實講, 屋企真係有一個同款既兜, 但size較細, 多d人食就唔夠用!!  依家有時請朋友返黎食飯, 閒閒地都七八個人, 當然要預備定d大兜裝餸啦.. (但其實都唔係成日請客! heee)

好險既係, 呢個兜真係超大!!! 我個焗爐都算大, 佢都係啱啱好打側先放得入.... 如果買左返黎先發覺入唔到爐, 實俾大少寸爆~ (好彩好彩)

係香港從來唔會叫焗豬扒飯食, 嫌佢太多汁兼豬扒粉多過肉!!! 但自己整既就完完全全唔同... 足料唔在講, 最緊要係一定健康過係街食呢~

今日有三個人食, 最後都食剩四份一, 聽日可以做我既午餐, 唔洗再食粟米片!  

其實呢個食譜係大少奶本書都有, 如果有買既你, 可以參照佢個版本!!

我係到就好快速咁講一講我以上既做法:

炒飯底:
1) 先煲飯, 比平時落少dd水或煮完焗耐d先炒, 飯會較乾身易炒
2) 蛋三隻, 打勻!  落油起獲, 落一半蛋快炒, 再落飯, 加鹽, 再落剩餘蛋汁炒勻, 備用

豬扒四件:
1) 洗淨, 抺乾, 用槌揼到佢扁晒先會鬆化(兩邊揼, 將原本拳頭咁大既豬扒揼到變手掌咁大就為之good!)
2) 醃1小時 (豉油, 糖, 粟粉, 胡椒)

一小時後.....
3) 將豬扒沾蛋漿, 再撲麵粉
4) 落油起獲, 大火煎香兩邊至金黃(每邊約二十秒), 撈起備用

醬汁:
1) 蕃茄四個(切楷), 磨菇適量(切片), 洋蔥兩個(切條)
2) 落油先炒香洋蔥, 加水2杯, 加PASTE醬(我用既係蕃茄磨菇醬)3大匙, 煮至淋身
3) 然後加入蕃茄, 糖, 鹽(自己試味), 再煮一陣, 最後加入磨菇略煮
4) 生粉加凍水打獻, 即可

最後:

炒飯鋪底, 放豬扒, 再平均倒上汁, 最後灑上芝士, 入爐220度焗20-25mins即可!!!!!!

p.s. 我自己本身唔愛太多汁, 怕d飯會索到一pat pat 咁, 所以我唔會倒太多汁係面, 啱啱鋪晒個面就夠... 寧願將d汁留起, 到食時唔夠先另加!!! (明唔明我意思??)

煎豬扒個方法係跟大少奶既食譜, 咁樣做比起煎熟舊扒先焗, D肉會唔un, 好軟熟!