我捨不得你~

一貫作風... 臨走前三小時先急急腳努力執喼... 最後要飛的入機場!

攪完一輪仲有一小時剩.. 今次一定要去Sky Plaza行下, 睇下咩特別~

一入到去..嘩..好似都真係幾大喎!!! 個天花整得好靚.... 不過感覺仍然係冷冷清清咁!

Shopping既店鋪無乜興趣行... 一支箭走去搵野食好過!  我地都預左班機超full,, 無可能做到upgrade..所以都係臨上機前食餐好~

呢到有好多唔同種類既餐廳... 中日意泰越乜都有!!  最後我揀左去食越南菜...

地方好大, 而且人又唔多... 同一間清亭越南菜館... 比起係銅鑼灣食..呢到真係舒服好多~~

我地就係坐呢款半圓梳化櫈... 好嘆呢!!! (唔知住東涌, 青衣既朋友, 會唔會無野做都走入黎食飯呢?? 我覺得唔錯喎~~ )

好整齊..好清潔...攪到我食指大動呀~~ (大少係屋企已經食過飯.. 叫我唔好嗌咁多... 但我實在太開心, 而且又係抱住個唔食無得食既心態... 我堅持叫左以下食物)

清甜美味既椰青.. (超正!)  & 大少既綠豆冰

咖喱雞翼湯檬 --- 唔難食, 但下次唔會叫!!! 我以為大少鐘意食...點知後來佢先話麻麻地咖喱湯!! 大少又以為我鐘意食... 點知我係就佢先叫... 唉!! 呢d係咪缺乏溝通呢?? heeeeeeeeeeeeee

越式炸春卷 ---- 好好食!! d生菜好新鮮... 用料又好味~~  正呀!!

蟹肉炒粉絲 ---- 粉絲係我既至愛... 炒出黎辣辣地... 好味!!

椒絲腐乳炒通菜 ---- 香港d菜真係好新鮮... 雖然杜拜都有通菜賣..但質素真係差天拱地... 所以每食一啖都好滿足呢~~

其實呢餐大少食得好少...大部份都係我一個人食晒!!! 超飽呢~~~ 如果唔係大少禁住我..我仲想要個豬頸肉&扎肉撈檬呀~~

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

多謝大家既祝福..我今次搭飛機竟然訓得著... 斷斷續續訓左六個鐘..剩餘時間睇下雜誌, 同大少傾下計就到杜拜啦... 好舒服!! 感謝主~~~

另外要唔該兩位同事黎接我地... 送到我地返屋企都十二點幾..辛苦晒!!!!

返到屋企..親切+陌生既感覺又出現~~ 因為在港期間安排鐘點姨姨黎抺屋... 佢執到間屋好整齊... 攪到我有d唔慣!! (因為廚房d 擺法唔同晒~~)

今次個喼... 又係超重!! 次次都俾人Mark 左係heavy~~  考慮左好耐既豆漿機..最後都係放棄... 下次睇下有冇機會啦~~

大少同我個喼都塞滿晒...  不過今次算好好...除左一人一個背囊... 無handcarry啦!!

大少個喼主力係 ---- 湯包 + 海味!

我個喼主力係 ----- 書, 麵食, 鞋, 小食, 幫人買既物件等.....

過去呢兩三個禮拜... 好似一陣風咁就吹走左... 時間過得好快!!!!  我同大少都唔捨得香港!!  尤其是係我... 今次有好多朋友叫我唔好咁快走, 留耐D~~  其實我都好想..不過一諗起大少無人照顧, 無人煮飯, 洗衫熨衫..我又唔忍心....

不過.. 我好快就返架啦!!!  大家等我呀~~