老積表姪仔

星期六晚係我表哥個仔仔擺百日酒, 大家仲記唔記得我之前話去醫院探佢,, 轉眼間又三個月大啦! 

原本以為自己JOIN唔到呢晚既喜宴, 但大少因公事會遲返, 所以我又可以參加! 難得大部份親戚都會到, 我好開心可以參與呢!

BB 三個月大就著大碼尿片,, 係一個肥仔呢! 個樣好老積, 但好可愛.. (其實逢係BB都好可愛)

BB一出場, 成為全場焦點啊! 個個都爭住抱, 爭住摸,,, 我連牌都唔打, 係咁痴實佢呢!

yeah,, 成功抱上手, BB好乖, 轉完一手又一手都無扭計, 任人舞!  我抱住佢真係唔捨得放手啊~ 好舒服啊!

最難得係我Daddy係一個好少笑既人, 佢見到BB都笑到見牙唔見眼!!!! BB既魔力真係好勁....  又或者老豆恨仔掛, 生著我係女, 所以見到BB仔特別興奮?!

BB係大耳隆! 你睇下佢隻耳仔同我老豆差不多大啊!

我地一致都覺得BB擺百日酒好過擺滿月酒, 因為一個月大既BB只係識訓覺, 莫講話抱, 可能見佢開眼既時間都唔多,, 今次有得抱又有得玩,, 個個大人都好開心呢!

尋日有好多表弟表妹, 堂細佬(來自台灣)都有黎,, 我同堂家姐都概嘆自己老左好多!! 以前表弟表妹啱啱出世, 我地都爭抱住佢地玩, 佢地都好痴我架!!   

轉眼間,, 個個都大個晒, 有D出黎做野, 有D中五中四, 有個升五年班, 有個升二年班...  依家又有一個小BB出世! 其實日子一日一日咁過, 平時都唔覺自己老左, 但見到d細路眨下眼又咁大,, 真係唔認老都唔得啊!!!