Diana Cookies

Thanks GOD!

唔該晒同事A幫我搶救部電腦, 今日終於用得返, 而且仲快過以前添~

我諗... 我真係要的起心肝定期Back up 部腦, 同埋唔好成日Download埋太多無謂野,, 今次救得返之前D data...真係好彩... 感謝主!

以下 d cookies 係上星期得閒時整俾大家食架! 牛油曲奇係我人生第一次學整既小吃! 初初整完覺得自己好勁, 竟然可以做到d 咁鬆脆既曲奇, 當時成日整返公司請人食, 個個都覺得我好叻咁 (實際係公司無乜人好似我咁得閒姐~~)

依家做曲奇唔敢再自稱有幾叻...因為呢樣野真係太簡單... 唔值得再為呢樣自豪 (尤其係呢樹高手林立!!) haaaaa

其實做乜都好, 都係一份心意,, 希望收到既人會喜歡!

一盤有朱古力粒粒....

一盤係齋牛油曲奇

新鮮出爐牛油曲奇真係好好食架

( 曾經, 我覺得自己整既曲奇係最好味,, 真係笑死人!)

越鬆脆既曲奇其實係落左越多牛油.... see! 好食既野多數都係致肥架~~

邊個食親就自認係為食的人啦..haaaaaaaaaaaaaaa  (好彩,, 唔洗幾日, D曲奇都俾佢地食晒啦~~)

食譜 : (此份量可做80-100件曲奇!)

材料 :

牛油 ..... 224g ; 砂糖 ..... 84g ; 高根粉 .... 184g ; 鷹粟粉 ..... 90g ; 全蛋 ... 1隻

做法 :

1) 牛油先打軟, 加入砂糖用中速打至米黃色

2) 打起後落蛋, 打至攪不到蛋液, 然後用中速加入高根粉, 打勻便可, 不要打太耐!

3) 隨個人喜好加入朱古力粒, 攪勻, 即可用唧袋唧出想要的款式

4) 用180度15分鐘, 如好快就轉色即代表你既爐火力大, 可較小些溫度... (焗完熄火後用餘溫焗多15MINS)