迷你英式鹹鬆餅

自搬左去新屋後, 我無得上網.....

唯一娛樂就係不停整cakes, 做餅, 做小吃!

雖唔講得技術超班... 但對我自己黎講,, 我好開心... 因為無諗過自己會不知不覺做左咁多食品出黎!

今次, 我跟書做左呢隻迷你英式鹹鬆餅....

自己本身好鐘意食scones, 記得以前中學時代, 放學好鐘意同同學三五成群去KFC 下午茶... 我必叫scones, 擦上厚厚牛油&士多啤梨果醬.... 一啖咬落去, 成口被鬆餅張住.... 食完會很滿足!!! (以前都唔識驚肥或怕唔健康!)

但年紀日漸增長, 唔可以再好似十六七歲咁乜都唔怕, 食左先算!  故此,  係飲食方面都不時提醒自已唔好食太咸, 太甜, 太多!

所以我係呢邊做既甜品, 蛋糕或小食.. 我做既份量都唔會做太大/太多.... 而且我絶對唔會獨吃, 會同大少既同事一齊分享!  一來可以與朋友分享, 係一件開心既事;  二來大家都唔洗怕會吃太多, 壞肚皮!

故意用較小型既圓模去做型, 一口一個.... 一個起, 兩個止,, 唔會太濟!

出爐啦... 好香牛油味,, 比起KFC... 我做既稍為遜色, 但依然美味! (因為新鮮熱辣麻!!)

一份麵團原本可做12個1.5寸既scones...但可能我做迷你版, 仲有好多麵團剩! 所以我將麵團放入雪櫃, 接下兩日都攞出黎即焗即吃作配餐... 一樣好味! 我想最緊要係新鮮出爐既野, 特別好味~~)

你地鐘唔鐘意吃Scones ??

**********************************************************************

食譜 :

無鹽牛油 ~~~~~ 70g (室溫)

麵粉 (低根) ~~~~ 230g

泡打粉 ~~~~~~~12g

salt ~~~~~~~~~~ 半茶匙

雞蛋 ~~~~~~~~~ 50g

酸忌廉 ~~~~~~~ 125g

做法 :

180度預熱焗爐

1. 將麵粉及泡打粉篩入碗內, 加入salt & 無鹽牛油, 然後用手搓勻(用手指壓偏牛油, 令麵粉同牛油MIX埋!)

2. 加入已打勻雞蛋&酸忌廉, 繼續用手搓勻至麵團狀.

3. 用保鮮紙包好, 放入雪櫃雪大約半小時

4. 用棍/手將麵團稍按軟, 然後用棍壓至約5毫米厚, 再將麵團對摺.... (大約1 cm高)

5. 用曲奇模割出圓型麵團, 最後係麵團面擦一層蛋黃液

6. 以180度焗15-20分鐘