為你而做

12.9.07 - 三色曲奇

一直都知道越鬆脆既曲奇, 就係有越多牛油成份....

所以, 自知道呢個事實後, 我都減少左做牛油曲奇既次數!!

不過由於之前Ivany講開Jenny Bakery既曲奇好鬆脆, 好想試下整... 我就介紹左我呢款曲奇既recipe俾佢..

但Ivany想知道如果要加咖啡味, 做法應該如何?? 

我根據個人失敗過既經驗, 同佢講左一次點做.. 不過, 始終自己未實際做過,, 好怕教錯人...

所以, 我唔放心都係走去做一次睇下成唔成功!!!

呢架熊出沒注意車仔係去北海道旅行時見到好得意買的... 本身佢盛載既食物都係曲奇... 但當然不及自己整個D好味啦!!

依家攞黎裝住一車自家三色曲奇 (左起 : 咖啡, 朱古力粒, 原味) 送俾大少同事食~~

呢一盒係Jenny Bakery既杏仁條... 係之前返HK, 靚靚blog友GG送俾我同大少食架... 事隔咁耐, d 杏仁條係六月返黎杜拜第三日已經食清光... 但個盒咁靚, 當然唔會掉左佢啦!!!

 

搖身一變, 又係我既三色曲奇... 呢一盒送俾幫我做Thai Massage 既姨姨食... (佢係正宗泰國人, 英文都唔識講... 所以我成日同佢雞同鴨講, 好好笑,,, 不過佢好鬼NICE,, 佢個名叫"爽靚" haaa

)

為答謝佢個個禮拜出心出力幫我按得咁"司酷",, 我就將我愛做不愛吃既食物送俾佢啦...

(咁樣算唔算好衰呢

??)

Ivany....你可以放心試做啦... 無論味道, 唧花外型都無問題呀!! GOOD呀~~

 

食譜 : (此份量可做80-100件曲奇!)

材料 :

牛油 ..... 224g ; 砂糖 ..... 84g ; 高根粉 .... 184g ; 鷹粟粉 ..... 90g ; 全蛋 ... 1隻

如果想加咖啡粉做咖啡味,, 可將5-7克咖啡粉(depends on 咖啡本身夠唔夠濃味) 加少少熱水溶左佢(足夠浸面即可!),  然後高粉要加返多20克, 否則麵糊太稀會hold唔住個唧花紋!

做法 :

1) 牛油先打軟, 加入砂糖用中速打至米黃色

2) 打起後落蛋, 打至攪不到蛋液, 然後用中速加入高根粉, 打勻便可, 不要打太耐! (如想可咖啡味可在加蛋液後加入, 和高粉一齊攪勻!)

3) 用唧袋唧出想要的款式, 隨個人喜好加入朱古力粒, 即可!

4) 用180度15分鐘, 如好快就轉色即代表你既爐火力大, 可較小些溫度... (焗完熄火後用餘溫焗多15MINS)