黒白雙星 - 芝麻奶皮卷

1 Sept 2007 - 芝麻奶皮卷

一向我都好少做中式糕點...

原因好簡單, 因為唔識做, 加上係呢到買糯米粉, 馬蹄粉呢類材料唔方便.. 所以就算想試做都會卻步!

不過, 上個星期偶然係雜誌見到呢隻芝麻奶皮卷, 覺得人地做得好靚,, 而且材料都唔係太麻煩

就試下啦~~

唉呀!! 出左黎既效果又有d似壽司添

... 點解我成日做既野出黎都會變左第二d野架?!

其實我做得唔算成功!! 因為芝麻卷理應好滑, 好通透! 但因為我攪拌黑芝麻時, 太心急.. 唔等佢完全攪爛就用黎煮.. 所以食落唔夠滑,, 賣相亦唔夠靚!!

(不過鐘意有口感既朋友, 就可能會鐘意有芝麻粒粒既感覺~)

呢個糕點味道其實幾清香, 但一d都唔會太甜.. (我地仲嫌唔夠甜),, 白色個層其實係有用奶, cream & 馬蹄粉做成, 夾住黎食多左一份奶味! (我覺得好味過淨係芝麻卷..) 不過唔鐘意既朋友, 可以唔加, 齋做芝麻卷都可以!

****************************************************************************************************

材料 : (二人份)

黑芝麻 ..... 30g ; 馬蹄粉 .... 60g ; 砂糖 ...... 60g (但我個人覺得呢個份量唔夠甜) ; 鮮奶 ..... 90g ; Cream ..... 少許 ; 水 .... 300g

做法 :

1) 先將黑芝麻加240g 水以攪拌機磨成芝麻水

2) 將半分馬蹄粉、半分砂糖、芝麻水 & 少許忌廉一齊用中火煮滾, 邊煮邊攪拌至稀糊狀; 然後平均地鋪進一個闊平的容器上, 隔水蒸5分鐘;

3) 再將鮮奶、水、剩餘的半分砂糖 & 半分馬蹄粉及少許忌廉一齊用中火煮滾,  邊煮邊攪拌至稀糊狀; 然後平均地將鮮奶水鋪在蒸好的芝麻皮上, 再隔水蒸5分鐘;

4) 置於溫室內冷卻, 最後捲成卷狀即可!

Tips :

1. 由於煮好的芝麻 OR 鮮奶都係稀糊狀(好杰), 所以自己要用匙巾平均壓薄鋪在闊平的容器上! (當然唔好鋪太厚啦, 否則捲出黎既效果會唔靚..)

2. 蒸好的芝麻奶皮切記要完全待涼才可捲成捲狀, 否則會黏在一起, 難以捲起