達成心願!

2 Sept 2007 - 芒果芝士慕士蛋糕

以前係香港, 我一見到靚芒果就會買黎整芒果布甸... (呢一款甜品亦係大少至愛

!!)

要係香港買到靚芒果, 似乎唔係一件難事!! (有時價錢較貴, 都會買, 因為知道實甜~~)

但過左黎杜拜呢邊, 想買靚生果... 唔在係容易既事!

我係呢到住左差不多一年, 大大話話買過五六次芒果.... 每次個價錢都至少港紙四五十蚊(兩隻!)

由於大少同我都好鐘意食芒果... 每次都抱住俾左咁既價錢.. 希望得到既回報會係令人滿意!

可惜.......十次買十次都難食到死!!! 一係唔甜, 一係就無味... 有d個皮都熟到出晒油... 諗住無死啦!! 點知又係一場空!!   對上個次買左切黎食... d芒果肉硬到好似蘋果咁爽... 唔係自己親手切都唔信係真芒果肉.. 以為自己食緊芒果乾~~

我同自己講, 我打死以後都唔會再花一分一毫去買芒果... 哼!

世事難料!! 前日俾我係家樂福見到d 埃及芒果真係好香... 熟到爛 (真係大部份都爛... 爛到摸落去好似摸水袋咁林!!) 

我呢d講野唔算數既人... 又一次動搖~

~ (大少已經係旁邊冷言 : 你仲想試呀?? 唔得架!!! 佢d味根本就唔係我地食開個d!!)

但係我呢d包拗頸.. 唔試唔心息... 精挑細選左幾個"無咁熟"既.. 放左一晚, 即刻試食一個~

~

味道當然都係無hk個d咁香甜... 但總算尚可接受

!!!  我當然啦啦聲整我想整左好耐既

芒果蛋糕啦!!

好開心,, 好滿足咁望住個芒果芝士蛋糕.... 再用手指餅圍邊.. 整靚佢!!

(其實都係自己人食.. 整咁多野純粹為個人手痕!!! yeah~ )

請人食之前, 我都要試下味... 唔好食就要報消呢~~ (我到依家都未掌握得好切餅技術!

)

底層係消化餅底, 中層芒果mousse 加果肉... 面層係芒果啫喱

今日努力做運動, 做家務就係為左品嚐一小件蛋糕~~ 味道都好芒果呀

 算係咁啦~~  食完即時透心涼!!  (不過唔知大少收唔收貨??)

原本想用糖粉作裝飾.. 上次買個盒, 一落即溶.. 之後特登再買多盒防潮...但呢到搵黎搵去都無寫明係防潮...

最後, 都買左左手邊個盒... 寫明 for cake Decorating , 應該啱用!!  一篩落去.. 即溶!!

我係咪又買錯呀

What's meaning of PERFECT for Cake Decorating???

REMARKS :

大少今日好夜返, 頭先俾左件芒果蛋糕佢食~~ 佢話好味.. 但個芒果都係差... 無香港d呂宋芒咁香甜!!! (車.. 我一早知你實會咁講!!)

現在係半夜1點45分, 準備入房訓時, 大少突然陶出一份禮物送俾我... HEEEEEEEEEE 好鬼開心

!! 不過太夜啦.. 依家要訓, 聽日再同大家share!!

________________________________________________________________________

材料 :  (6"mould)

預備 : Cream Cheese 先放在室溫解凍至少2-3小時 ; 魚膠粉用適量溫水開(約蓋過魚膠粉便可) 再用熱水座溶

淡忌廉 .......... 90 g ; sugar .......... 35g ; Cream Cheese ......150g ; 芒果茸 .......... 80g ; 魚膠粉 ........... 7g ; 蛋黃 .......... 2隻 ;  芒果粒 ......... 40g

餅底 :

消化餅碎 ..... 80g ; melted butter : 35g (做好後放入雪櫃備用)

Step  :

1. 先將淡忌廉打至七成企身, 備用!

2. 打Cream Cheese 至軟身, 分三次加入糖打勻 ;  再分3次加入蛋黃, 打勻; 取後加入芒果茸打勻

3. 將2之芝士漿拌少少落魚膠粉溶液, 攪勻... 再將所有魚膠溶液倒回芝士漿內

4. 將1 之淡忌廉拌入3之芝士漿中攪勻

5. 將4之混合物倒一半入已鋪餅底之模內, 加入芒果粒, 再倒下餘下的混合物, 在枱上輕敲2 下作排氣! 雪2小時~~

6. 最後用100g 芒果茸加7.5g 魚膠粉作芒果啫喱倒上面, 再雪2小時, 即可 (此步驟可按個人喜好加減!!)