好悶啊!

實不相瞞, 過去個餐中秋飯所整既滷味雞翼, 食到尋日都仲食緊, 因為整左太多太多... 食唔晒!

夜晚臨訓前大少會睇書, 而我就鐘意訓係佢隔離準備待睡狀態, 偶然騷擾下佢

係張床典黎典去既我突然講起 : 我諗D滷味食埋聽日, 應該清得晒, 終於唔洗再食啦!! 不過D汁就咁倒左去真係好嘥, 你話好唔好再醃其他野??

睇緊書既大少 : .......... 唔洗咁急又再醃, 你可以倒起d 汁, 雪入雪格, 遲d想食咪再整囉, 呢d汁越食越好味架, 你唔洗倒左佢!

我 : 得架咩?? d 汁可以咁樣雪住再用咩?? (好懷疑!!)

大少 : 緊係得啦, 人地個d 牛腩湯底都係越煲越入味架!!

我 : 咦,, 咁你估有一日我地會唔會靠呢煲滷水汁起家發達呢?? 

大少開始唔理我...

我 : 如果真係成功既話, 我會幫我既鋪頭改個名,,, 叫咩好呢??  啊, 我會叫佢做"調理滷味",  因為呢煲野真係我自己調理出黎架麻, 你明唔明啊?? 調理身子個"調理"啊! 幾夠氣勢~

大少繼續唔理我...

我繼續自得其樂咁講:  嗱, 如果有人問,, 喂, 你有冇聽過"調理滷味"啊? 聽講d 滷味醃得好好食架!

當我以為大少唔會俾反應我個刻, 佢竟然答左句 : "調理滷味"!!!(真係好似講粗口既語氣!)  我緊係聽講啦, 咁出名!!!!

然後佢繼續睇書,, 我就繼續係佢隔離發表瘋人語錄!

************************************************************************

最近我地開始痴左線咁學人早睡早起!  有一次試過七點食完飯, 八點幾就上床訓, 訓到第二朝七點, 依家最遲十一點半都會上床, 十二點前必訓著.... 希望呢d正常生活可以Keep住, 我想test下個黑眼圈係咪又會好快無左?!

尋日我悶到發荒, 乜都做唔到,, 又無新戲睇,, 唯有死死地氣走去做運動.. 今日又會係好悶既一日.  唉, 我隻手幾時先會好返啊????