禍不單行

對於呢個湯種芝麻吐司, 真係一言難盡~

返左黎咁耐, 試過整一隻隻既白芝麻包, 不過唔靚仔, 所以無post出黎! 前幾日買左一包新既日版高粉, 一心要跟新書"65度湯種麵包"整呢個黑芝麻吐司, 點知攪到一獲泡!!

不可思議事件簿:

1.  由於平時做湯種包都係上網跟別人既食譜, 所以份量無問題! 今次自己睇書做, 但書上份量太多, 唯有自己動動腦筋重新計算過,,, 就係咁就出事!!

原本5份水1份粉既比例, 我竟然低能到變左5份粉, 1份水!  Oh,,好明顯, 1份水係溶唔到5份粉, 就係咁, 130g高粉就此泡湯!! 重新做過...

2.  面對1既問題尚算小事, 因為仲有得救; 轉個頭又發現屋企無晒奶,, 唯有硬著頭皮用忌廉頂住先,, 應該OK掛~

3.  又係眼大睇過籠出事!!!!!! 40g既牛油, 竟睇錯隔離194g (<--此份量應屬牛奶),, 怪唔知得搓極個麵團都咁油啦????  仲要搓左廿分鐘先知,, 你話死唔死!!

頭個兩個錯都可以補救, 去到第三個錯, 我真係唔識救,, 最後成舊麵團掉左入垃圾筒!

死唔心息既我, 即時再接再勵做多次, 今次我金晴火眼望清望楚個份量黎做, 不容有失!!!!

但唔知係咪因為用cream黎代替牛油既關係, 搓起上黎唔夠濕潤, 中間自己又要不斷加水... 總之就"濕濟"啦~

最後有驚無險都算焗到出黎, 味道質感都唔錯,,, 無白費我一番心機啊!!! (感覺有如老懷安慰~)

今日都唔知發咩瘟, 又唔係第一次做包包, 竟然犯下咁mission impossible 既大錯!!  連大少都話我 : 好明顯你做既時候係到發緊夢, 有乜理由1份水可以開5份粉, 諗都知無可能啦, 牛油仲攪笑, 點會用成磚牛油架?!

無錯,,, 我承認係我蠢, 係我低B,,, 做野成日都唔用腦, 搬字過字都算, 仲要搬錯字!! 嗚~ 所以個天都睇唔過眼要懲罰我...

就係我做第二次發酵, 當我放個麵團入焗爐時, 唔遺意掂到焗爐既發熱線"辣"親隻手, 痛到我即時大喊啊!! 嗚~~~ (你地話係咪禍不單行)

雖然千辛萬苦先做到呢個吐司, 但見大少食得好開心, 乜都抵返! (呢樽Peanut Butter係大少最近既新竉,, 除花生醬外, 仲有蜜糖, 味道的確唔錯)

有左呢次咁"堅"既教訓, 我下次一定一定一定會擘大對眼睇清楚自己係到做緊乜?!