中秋節快樂 (附食譜)

中秋節快樂!!!!

話咁快又到中秋, 記得上一次邀請各同事黎屋企食"慶典飯"已經係年頭既年三十晚既事; 轉眼間又到年尾九月, 仲有三個月又到聖誕, 時間真係過得好快好快,,, 快到有d 驚啊!!

當然係中東地區係無可能有中秋氣氛, 但身為中國人既我地, 中秋都算係值得重視既日子, 為左呢日"做節", 我前一個禮拜已經不停搜羅及研究菜式, 為呢日做好準備!!!!

主要菜式 :

老少咸宜既滷水雞, 前一晚已經開始滷, 夠晒入味!!!

呢款"螞蟻上樹"係跟書學, 做法好簡單, 好好味!! 但我唔明點解要叫螞蟻上樹?

喼汁焗肉排, 個汁好好味, 但肉排稍為有少少'UN', 要再作研究研究!!!

大少激讚既咕嚕蝦球,, 甜甜酸酸既汁好開胃, 做法一d都唔難, 易過做咕嚕肉呢!

我好少煮咁多人既飯, 雖然預備各樣材料都好花時間, 又要醃, 又要洗, 係廚房由朝企到晚, 但每見大家食得津津樂道, 開開心心, 我就會有一份滿足感, 好感恩神賜我有能力為別人付出, 帶快樂給別人.

飯後大家圍埋一齊傾計, 食月餅!!  呢個月餅係馬來西亞黎既同事送俾我地, 第一次見到月餅上有英文, 好攪笑, 而且仲要係"芝古力"味!!

其間有個同事話, 當年美國聲稱自己係第一個國家將人類帶到月球, 然後係月球影左一幅相係"假"架喎!! 依家科技發達左, 有報導指出有科學家踢爆話呢件事根本係假, 張相好多破讚, 根本呢個世界無人上過月球!?  

又話金字塔係外星人起, 因為連依家既人都研究唔到點解當年可以用有限既資源, 技術, 但又咁準確咁起一座金字塔?!!

究竟係咪真??

Anyway,, 希望大家都有個開開心心既中秋節!!!!

至愛推介 ----   咕嚕蝦球食譜 :

材料 : 中蝦8-10隻; 青,紅椒各一隻; 菠蘿一罐(細); 蒜茸, 蔥少許

1)  洗淨中蝦, 挑腸, 抺乾, 加入鹽&胡椒粉少許, 生粉半湯匙, 蛋液少許醃一小時
2)  準備青紅甜椒, 波蘿切粒備用
3)  落油燒熱獲略炒青紅甜椒, 撈起備用 (切忌過熟)
4)  中蝦沾上生粉, 熱油炸至金黃熟透撈起備用
5)  爆香蒜茸, 乾蔥, 加入水半碗, 白醋少許, 糖3-4湯匙, 茄汁1/3碗, 生粉半茶匙  (其實所有份量都可以隨意, 最緊要最後試味自己覺得OK就得), 最後將中蝦, 青紅椒及波蘿回鑊炒一炒拌勻即可!