我又黎"地門日"

o黎o黎o黎, 追返香港既步伐先!!!

尋日920係阿茄(Karen)十八歲生日會大日子, 原本我一早應承會出席為佢慶祝, 但大家都知我既schedule係幾咁飄忽, 最後未能赴約, 唯有係呢邊夾住你地, 一齊同步進行啦~

今次主題係美國菜,, 我一早就奮勇報名要做Spaghetti (因為自己都好耐無煮, 好想食, hee)

好耐無煮既蕃茄大蝦義粉.... 呢款味道既義粉我真係百吃不厭!!!!!

平時我唔愛吃洋蔥, 除非炒到好熟好淋, 但我知大少鐘意食, 所以今次都加左一個洋蔥落去炒, 但切洋蔥時都係難逃會"哪"眼既命運! 曾經聽過人教唔知點樣可以切洋蔥唔會'哪'眼, 但我唔記得左個方法, 有冇人可以提供??

話晒係阿茄既生日會(其實又係自己想食!), 我做多款茄粒牛油果沙律配芝麻醬!

仲有仲有一罐超多粟米既粟米濃湯,, 超讚!!

嗱,, 我真係有做野架, 只係差在無煮十個人份量姐, hee!  阿茄, 返黎同你補食生日飯下.. 乖啦~

********************************************************************************

其實尋日係超級無敵攰, 因為前一晚唔夠訓, 跟住尋日一早要揸車兩三個鐘頭車去Oman攪visa run, 一來一回總共花左七個鐘黎遊車河!  仲要烈日當空, 上車落車攪出入境, 俾人點黎點去, 先出Abu Dhabi 境, 然後又要入Oman 境, 再出Oman境, 最後再入返Abu Dhabi 境,,, 人都癲!

返到黎大少同我都攰到甩肺,, 佢仲要笑笑口暗串我:  啊! 點解你唔洗揸車齋坐都咁攰既?

我答佢 : 平時坐飛機夠唔係你揸機, 咁你每次坐完咪又係嗌好攰!

去到Oman先發現佢地呢到好多山,, 係連綿不斷, 見唔到盡頭既山...

好奇怪, 乜呢到唔係沙漠地區咩??

一年幾前黎Oman做Visa Run, 佢地連入境大堂都無, 只係一間臨時搭建既爛鬼屋仔, 點知依家去, 佢地已經起左個咁靚既"入境大堂", 勁!