低脂士多啤梨乳酪慕士蛋糕

29 July 2007 - 低脂士多啤梨乳酪慕士蛋糕

巴黎五天精華遊已經完滿結束.... 我又要返返現實生活, 繼續做好我既本份!

不過, 最近既我要減產呀.... 為的是要努力減肥!!!!

十月會返台灣探媽咪... 媽咪係一個較傳統的人, 由細到大都唔鐘意我太肥, 唔鐘意我大聲講野, 唔鐘意我食野食得快, 唔鐘意我懶, 唔鐘意我無禮貌...etc.

一句講晒, 我媽咪對我要求係幾高... 佢(妄)想將我train為一個淑女!!! (可惜我遠遠無法達到佢既要求!)

所以每次返台灣探佢都好大壓力,, 怕佢又會話我... 近呢年幾都無返去, 因為媽咪自己工作上唔得閒, 我又過左黎杜拜... 所以今次返去, 我希望大家都開心.. 唔好有乜拗撬!!!

依家, 唯有post返D舊照俾自己望梅止渴啦~~

呢個係用左低脂乳酪&急凍士多啤梨蓉做的, 糖份亦減少左... 應該無咁高卡路厘掛! 

新買左D有花紋既通花紙.. 只需鋪係個蛋糕上面, 瀉上可可粉,, 拿走通花紙, 就可做出靚靚圖案!

呢個馬騮仔係四五年前以同事身份送給大少的擺設... 想不到佢原來一直keep係身邊,, 就算過左黎杜拜做野, 佢都一樣有帶佢過黎... 我真係好感動佢咁珍惜我送俾佢既野!!

同事們都話呢個蛋糕好清新,, 唔太甜... 好好味!!!

另外係呢邊既日本城買左塊類似墊枱墊既物體...但比墊枱墊較硬身! 方便我可以將蛋糕脫模後放上去, 連墊一齊放入雪櫃雪, 而且上面又有標記尺寸, 方便量度, 仲可以係上面切蛋糕... 認真方便!

我依家就係靠佢將個蛋糕搬黎搬去都唔怕花整爛個蛋糕啦!!!  日本人發明既野真係不得不讚夠細心!

你地喜歡呢個蛋糕嗎??

多謝大家咁賞面呀.... 食譜如下 :

材料 : (以下係for 6寸圓形mould) 但我做o個個係8寸, 自己計返個比例出黎就可以!

餅底 :

低脂消化餅碎 ..... 60g ; 無鹽牛油溶液 ......... 30g

低脂士多啤梨乳酪慕士 :

急凍士多啤梨茸 ........ 165g (預先放入微波爐加熱溶解) ; 蛋白霜 (蛋白... 44g ; sugar ..... 44g) ; 低脂原味乳酪 ..... 55g ; 淡忌廉 ..... 130g ; 魚膠粉 .... 10g

做法 :

首先, 先將消化餅碎薄薄均勻鋪在mould內, 然後放入雪櫃冷藏約半至一小時, 備用!

1) 將蛋白用電機以中速打拂至多泡, 分2-3次倒入砂糖, 繼續打至企身

2) 另將淡忌廉以中速打至企身

3) 將士多啤梨果茸倒入Step 1, 用膠刮攪拌

4) 用麵粉篩把低脂乳酪過濾, 然後加入step 3混合物中, 輕輕攪勻。最後加入已打起之淡忌廉拌勻

5) 將魚膠粉用室溫水溶解, 再預備一碗熱水將魚膠粉坐溶至完全溶解 (像水狀般)

6) 將已溶解之魚膠粉倒入step 4, 迅速及徹底攪勻。倒入已預備之餅底內, 放入雪櫃冷藏約1-2小時, 即可!

最後, 可用新鮮士多啤梨或隨意裝飾, 便可做成人見人愛既蛋糕啦!!!