我的愛心早餐

每日我都會為大少預備愛心早餐...

早餐對於每個人黎講都係必需&重要!  人體經過一晚長時間消耗及停止吸收養份... 一早起身, 係最需要補添營養先可以健康 & 有效率地進行各樣體力開支!! 

雖然我識得有D朋友係無食早餐既習慣, 或是匆匆忙忙求其食左唔餓就算~~ 原因無他既.. 我自己都做過打工仔! 明白朝早D時間分秒必爭... 好難仲可以嘆個靚早餐, 咪講話想係屋企食埋先返工, 有時想買個新鮮熱辣既麵包都難!!

我自己由細到大都好希望屋企有媽媽為我預備好早餐, 可以食飽先返學返工.. 但呢個願望從來都無實現過!  我成日睇電影, 見到外國人既家庭.. 朝早都會一家人坐係餐枱到食早餐, 將鮮奶, 橙汁遞黎遞去.. 多士放係中間, 要食就攞, 我覺得好溫馨.... 所以, 就算依家得我同大少兩個人, 我都會用心做好每一朝既早餐, 希望令佢食既時候覺得溫暖, 而且有充足既體力去應付繁忙既工作~~

以下, 係我精心挑選左幾張較為豐富既早餐~~ 

大少鐘意食Burger, 有時買D急凍牛肉漢堡扒, 抄隻蛋... 都好味過M記好多!!

另一樣大少至愛, 熱香餅... 我用開粉個隻, 加蛋加Oliver Oil,, 煎出黎不油不膩!!

蕃茄餐肉通.. 用鮮蕃茄滾個湯底出黎食, 好好味架!! 有時lunch都會食~~

餐蛋米, 大少經常話好回味茶餐廳既餐蛋米... 所以我偶然都會為佢煮~~~

格仔餅,, 係肉桂味.... 只需放入焗爐焗10-15分鐘即可...好方便!

有時前一晚整定D吞拿魚沙律, 第二朝只需烘熱麵包... 就可以食啦!!

一星期有一至兩日, 我會安排粟米片或麥皮作清腸胃.. 日日咁豐富都唔得 (其實係俾藉口自己唔洗攪咁多野... 有時我遲左起身, 我就會話 : 呢排你食太多啦, 今日食麥皮啦!!  大少就乖乖回應 : 哦~~~ )

其實早餐黎黎去去都係煮個D.... 以上只係精選圖片, 咪以為日日都係咁豐富!!   我地大部份時候都係食烘多士, 炒蛋或庵列.... 但我既早餐必有既係蕃茄同青瓜!!

每朝食完豐富既早餐, 加速腸臟蠕動...隨後我地就會好舒暢咁辦大事啦~~~ 哈哈哈!! 食得瞓得疴得... 仲唔人生一樂也!!!