Coffee or Tea?? (已附recipe)

因為我唔係每日都上到網upload...加上之前花左好多時間post北海道之旅,, 所以攪到依家每日post既都唔係新鮮之作~~~

幸好.. 平時我都有用日期黎作folder名稱, 以作記錄!

今次呢個冰凍咖啡蛋糕係 7 July 07 製作~~ 慶祝777 lucky day!!! (玩老虎機777為中大獎!!)

為左整呢款蛋糕, 特登買左一pack小型玻璃杯... 一pack六隻... 十幾蚊港紙, 都唔算貴!

完成後, 再唧少少自打甜忌廉作配塔... 可可粉作裝飾, 放入雪櫃雪2小時!!!

炎炎夏日, 係杜拜41度高溫下享用呢杯冰凍蛋糕... 好滿足呢~~

呢張係大少影....

如果鐘意飲咖啡既人一定會被佢深深吸引... 因為好香咖啡味, 連埋甜忌廉一齊食,, 非常美味!!

食完仲會齒夾留香添~~~

(我今次用阿拉伯咖啡粉, 比起雀巢咖啡既expresso... 更加香濃!!! 我諗喜歡飲咖啡既朋友, 可以向我落定order... 我下次可以買定呢隻咖啡粉當作手信!!)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

預備 :

- 以180度預熱焗爐15分鐘

- cream cheese 放於室溫解凍至少1小時

- 將即用咖啡粉加熱水溶解

材料 :

咖啡芝士蛋糕 :  

- cream cheese .... 250g ; sugar .......70g ; 淡忌廉 ......125g ; 蛋黃 .... 25g ; 蛋白 ..... 80g ; 即溶咖啡粉 ..... 7g ; 熱水 .... 1湯匙 ; 粟粉 ..... 15g; 雲尼拿油 .... 1/4tsp

自製甜忌廉 :

淡忌廉 .... 80g ; sugar .... 6g ; 雲尼拿油 .... 1/4tsp

做法 :

1) 用電機將淡忌廉以中速打至起勾, 備用

2) 用電機以中速將cream cheese打至軟身, 然後分次加入糖, 繼續打勻

3) 將蛋黃&蛋白打勻, 分兩次加入2中, 用電機繼續以慢速打勻

4) 將咖啡溶液倒入3, 用膠刮拌勻, 然後再加入雲尼拿油&粟粉拌勻

5) 將1的淡忌廉倒入4, 拌均; 然後倒入小玻璃杯內 (六至七成滿), 以180度焗30-35分鐘(視乎火力)

最後, 自製甜忌廉 (如果唔想自己打, 都可以買現成枝裝甜忌廉代替, 不過我自己覺得自己打好味好多!!)

用電機以中速將淡忌廉打至起泡, 加入糖&雲尼拿油, 繼續打至企身即停。

待蛋糕出爐及放涼後, 將甜忌廉以個人喜好鋪上多少~~~ 放入雪櫃雪1小時。

享用時可撒上可可粉或肉桂粉作裝飾!

(P.S. 因為咖啡粉隻隻唔同, 如果鐘意飲咖啡既人, 想咖啡味重D, 我建意你地用金裝或特濃個種既咖啡粉, 因為我之前整咖啡蛋糕, 用普通雀巢都無乜咖啡味!)

希望你地都成功做到啦~~