士多啤梨瑞士卷~~~ (已附recipe ^_^)

我之前講話自己得閒無野做就整蛋糕, 以下呢款係我自己最鐘意既其中一款~~~

士多啤梨瑞士卷!!!!

呢款蛋糕唔難整, 但步驟較煩覆, 但味道卻相當唔錯.... 因為蛋糕鬆軟, 加上自己打發既甜忌廉, 寧舍好味... 唔會太甜太漏既感覺!! 仲有仲有, 點少得我至愛士多啤梨呢~~~

Yeah~~~~  好味到做完自己都忍唔住食左兩件添!!

呢款瑞士卷係我第一次做, 落Cream落得唔夠rich, 士多啤梨粒落得又唔夠多! (下次要檢討下~~)

留左四件俾大少放工後品嚐....

呢一盒當然又係送俾大少D同事食, 一齊分享嘛~~~ (整得太少, 攪到個個食到到喉唔到肺!! 真係有D唔好意思~~~)

夜晚食完飯後.. 我又精心泡製呢個甜品俾佢食.... 加上Haggen Dazs 既Stawberry Cheese Cake ice cream... 好味到暈呀~~~~

材料 :

海棉蛋糕 ~~

A) 蛋白..... 120克 ; 砂糖..... 60克;  蛋黃..... 80克; 砂糖.... 20克; 菜油.... 60克; 牛奶.... 60克; 麵粉 ..... 80克; 泡打粉 ...... 1/2 茶匙; 梳打粉 ....... 1/4茶匙

自製雲尼拿忌廉 ~~

淡忌廉 ...... 200克 ; 砂糖 ....... 20克 ; 雲尼拿油 .... 1/2茶匙 ; 冧酒 ..... 1/4茶匙

饀料 ~~

自選喜愛生果/果醬 (自由發揮!)

做法 :

先打起雲尼拿忌廉 ~~

1) 用電機以中速打起淡忌廉至多泡, 分2-3次慢慢加入砂糖打均, 最後加入雲尼拿油及冧酒, 繼續將忌廉打至企身, 備用!

海棉蛋糕 ~~

1) 將A 份材料既蛋白用電機打至起泡, 分2-3次慢慢加入A份砂糖, 繼續打至企身, 備用

2) 準備另一器皿, 用電機以中速將蛋黃稍作打勻, 分2-3次慢慢加入砂糖, 繼續打至淺黃色(確保打至淺黃色先好停!)

3) 將牛奶及菜油倒入2之蛋漿內打勻; 分2-3次用篩篩入麵粉、泡打粉及梳打粉, 然後用電機打勻即停

4) 先將1/3 打起的蛋白霜混入3, 用手輕輕拌勻; 然後將3全部倒入蛋白霜內, 繼續用手輕輕攪勻

5) 將4之混合物倒入一個已鋪牛油紙既平模到, 用膠刮抺平表面, 以180度焗15分鐘 (視乎焗爐火力而定!)

6) 蛋糕出爐後放涼, 之後將蛋糕起出放在另一張新的牛油紙上, 撕走原本入爐的牛油紙

7) 用膠刀在蛋糕面抺上雲尼拿忌廉(厚D好味D)/果醬; 再加入喜愛既生果粒...

8) 將海棉蛋糕慢慢小心卷起成卷蛋形 ; 再用牛油紙將蛋卷卷實以作定形 (好似包壽司咁!!)

9) 用保鮮紙包好卷蛋糕, 放入雪櫃雪約一小時; 最後切件便可享用