我愛廚房!!!

啱啱篇懶人晚餐, 有好多Blog 友都會好奇, 點解我話求其煮既飯都可以咁多料... 

其實, 我家廚房真係有好多儲備糧食... 乾貨/濕貨一大堆!!

原因唔係因為我地咁大食, 而係呢到唔似香港咁, 可以日日好方便落街市買新鮮餸菜... 一來呢到所謂既街市 (都有既, 但只開早上, 以及個街市係類似批發市場咁, 唔係真係平時行開個D街市!) 二來家樂福/有稍為靚d既餸買的地方都係較遠, 必需揸車出動!

所以, 每逢趁大少放假或者得閒時, 我地都會去大量入貨 (呢一樣亦係我平時唯一既大大大娛樂!!!  笑死人, 去家樂福係唯一大既娛樂~~  但事實亦係如此!!) 大約每星期去一至兩次啦..

就係咁, 屋企雪櫃永遠都放滿食物... 而冰格更加長期雪定大量肉類, 海鮮, pizza, 水餃等....

雖然聽落咁樣好似好唔新鮮, 香港人咩都要求新鮮架麻!!  但無辦法... 初初我黎都接受唔到,, 但久而久之, 都係要屈服!!  更何況呢到D野不嬲都係唔新鮮, 永遠都無活既海鮮賣, 與其係咁, 都要接受事實, 買定放係屋企, 好過想食又要突登揸車出去買!

呢個係我既乾貨部, 有齊罐頭食物, 麵食, 米, pancake粉等... 我地好多時都會食義粉, 通粉, 所以呢d我地都會買定幾包放係屋企看門口!

另一個係小食部... 但最近要減肥, 呢個櫃好耐無開過, 亦都無添置新食物lu....

我家雪櫃,, 初初買雪櫃時.. 我覺得兩個人洗乜買咁大個雪櫃呀~~ 但原來我錯啦!! 如果係到生活, 呢個雪櫃都係啱啱勉強夠放咋!  (如果買左個大西瓜,, 真係無位放~~

) 

就係因為次次都大量入貨, 所以每入完貨, 我都會寫低個雪櫃究竟有D咩,, 費事成日放到過晒期都唔記得攞出黎食!

另外個日曆亦係提自己d 牛奶, 乳酪, 酸忌廉等既野幾時到期, 否則又係會放到過晒期 (因為我實在試得太多!!!)

唔好以為我家個廚房咁大, d野唔會無位放?!  你地睇下, 真係唔夠位架,, 飯煲、多士爐、焗爐... 放晒出黎後, 攪到個微波爐即刻要打入冷宮放係櫃入面, 用個時先插電!!!  

有時大少都話, 點解我地兩個人住, 咁大個廚房都唔夠用!!

 第時返香港, 個廚房可能連呢到一半都無, 咁d野點放呀???    下, 我都唔知喎, 到時放唔到都要放架啦!! 

雖然呢到咩都唔及香港好, 唯一好處就係地方大, 我真係好愛呢個大廚房架!!!

廚房呀廚房,, 我愛你呀~~~

大少... 唔該努力D搵錢, 將來俾返呢個廚房我呀!! (今晚又要早D訓先~  )