尋日朝早一早起身整左大少最鐘意食既PANCAKE俾佢做早餐, 等佢返左工之後, 我又要開機洗衫, 又要收衫, 熨衫, 整定D薯仔蛋沙律俾大少黎緊兩日肚餓時可以即刻食住沙律先..... 攪左成朝, 對眼都仲係好眼訓, 個眼皮仲好重, 好想訓.... 但諗起仲有咁多野未做, 我都係唔想訓, 寧願留返上機先訓... 如果可以, 我直程想整定黎緊兩個禮拜既飯擺係到俾大少食...
去到十二點, 就快要出門口去機場, 都係想自己落廚煮多餐飯俾大少食 (雖然成朝無停過手, 而且個喼又未執好), 我入到廚房望下個雪櫃, 見到仲有三塊豬扒剩, 又有D蘆荀剩, 好快就諗左煎豬扒加炒個清清地既炒飯.... 其實我自己好開心, 因為發覺自己真係有成長到, 有進步到....
加埋杯凍零樂, 簡直無得嘆!
記得初初黎到杜拜, 我都唔係好識煮飯, 好似上演緊美女廚房咁, 試過煮完D野食, 難食到自己食完都想嘔, 我原本只係識炒下菜, 煎魚同埋蕃茄炒蛋,三味!! 諗住帶住三味菜式黎到呢邊,, 到時食厭左先算啦... 但好好彩, 感謝主賜俾我有能力去嘗試煮新菜式, 好多時都成功...... 同埋好多謝大少既包容, 我知可能我有時煮既野並非真係咁好食... 但你都全部食晒, 而且從來都無嫌過... 令到我有信心不斷再學習, 嘗試..... 多謝你!!
另外覺得自己成長左既原因係... 係我屋企人心目中, 我係一個乜都唔識, 又懶, 又大小姐脾氣既女... 初初佢地都好擔心我過左去杜拜無人照顧, 又乜都唔識, 會唔會俾人嫌棄, 俾到麻煩人架, 尤其我媽咪成日話我嬌生慣養.... 但回顧返同大少一齊左一個月多D.. 我覺得自己不斷學習點樣去做好一個"人地既女人", 想自己既男人生活得開心, 唔好為家中小事而煩惱, 返到屋企只係享受家庭溫暖就得啦, 其他細節野, 盡可能我都自己攪掂! 而我諗, 呢一點,,, 我諗我都算做到.. 可能未到100分, 但起碼我真係好用心去做好佢, 而且做得好enjoy...
黎緊仲有好多日子要同大少一齊面對... 我都希望自己會一直進步落去 ^_^ 好多人問我, 你咁後生, 有冇咩目標, 想進修下呀? 其實我由細到大既目標真係只係想有溫暖既屋企, 有個好錫我既老公, 我係一個好賢良淑德既家庭主婦.... 一家人好開心咁過生活... 呢個就係我既做人目標!!! 其實我覺得自己依家好似已經踏左半隻腳入我個目標到, 至於係咪真係成功, 我諗真係要等結左婚, 生左BB先知... 所以如果有人問我頭先個D問題, 我真係唔知點答, 我係咪同你講, 我既目標已經達到啦.... 我想進修既科目係廚藝科?! 好多時我都唔敢同人情講呢D真心話, 可能驚人地會笑我太天真, 太無大志... 但我就係一個咁樣既人, 咁可以點? 點解大學無一科係教 "家務助理/"如何建立快樂家庭"既課程讀呢? 如果有, 我一定好有興趣讀... 人既一生除左工作外, 家庭亦都相當緊要,, 有事業, 但無完美家庭, 呢個人未必會開心; 但事業平平, 不過有一個溫馨美滿既家庭, 我諗比起任何野都緊要掛?
都唔知點解無啦啦有感而發? Anyway,, 好多謝支持我既朋友 & 我DADDY, 媽咪.. 多謝你地尊重我既決定.
感動:]
回覆刪除哈哈～令自己既男人開心一直都係妳既強項啦，依家重目標清晰添，睇見我都開心呀，嘩哈哈～～最緊要妳都認同自己既能力，覺得自己係掂既，呢個已經係好大既進步喇！知冇！？加油～support C!
回覆刪除做你男朋友真係幸福啦, 我自問真係做唔到好似係咁.. 我反而想我第時個老公可以分擔下d家頭細務, 一人做一d咁....(如果我要返工o既話)
回覆刪除如果我係男人...我一定會同dardar "lin" 個你死我活囉...務求要追你返黎,因為你真係一個好正既女人呀!
回覆刪除Diana , 再見返你發覺你真係成熟左好多. 不過見到你咁開心 , 我都好開心. 希望你早日同大少都 ..dan dan dan dan ....... 唔好凈係做比人呀 , 做set 比自己 !!
回覆刪除我想法同你一樣，但朋友覺得這種生活好廢，唉！
回覆刪除