Night at the Museum

依家已經係2007年1月1號.... 新年快樂!!!!!  杜拜呢邊有放煙花, 但我地睇得唔係太清楚, 而且睇既時候已經係水尾lu....  我都係鐘意香港新年放個d煙花, 壯觀好多!!!

今日同大少出dubai諗住去Ski Dubai滑雪, 但由於今日呢d大日子, 個個都一家大細出街玩,,, 好似所有人都去晒Mall of Emirates到慶祝咁, 多人多到爆,,,成個Mall都迫滿黑白人 (黑 = 著黑袍由頭包到落腳既女人, 白 = 著白袍, d白袍白到好似新買咁既男人)  好攪笑, 好少見咁人齊,, 個氣氛都ok唔錯, 至少好過聖誕節好多..... 所以我都最後都無去ski,, 改左去睇戲....

黎左杜拜咁耐, 第一次戲院睇戲, 因為無字幕, 要齋聽英文, 所以我地特登揀一d無咁難明既戲睇, 大少原本想睇007, 但個時間唔係咁夾我地, 所以我地就改睇一套叫做 "Night at the Museum", 睇到呢套戲既poster時, 我諗係一D帶有少少迷離既恐怖片,, 因為張poster都無乜影到有咩主角, 只係俾到一種感覺我係 "應該係講個museum既展覽品到夜晚會識郁, 跟住捉左d人唔知去邊個類啦",,,

點知.. 開場無耐就見到個男主角賓史迪拿, 大少同我都不約而同咁 '下, 佢做呀!! 咁一定係笑片啦!'  結果真係好好笑..

 雖然我唔係十足十聽得明佢地每一個字, 但好好彩都無睇到R晒頭咁,, 最抵死係故事生鬼, 加上劇中演員鬼馬, 所以我地都睇得好投入....值得推介俾各位... 不過我唔知香港依家做左未?  

另外最攪笑既地方係, dubai呢到d人睇戲好鬼投入架, 一睇到d好笑位或者激動到佢地心弦既位, 佢地會好似睇緊演唱會咁拍手叫座, 又會吹口哨,,, 好似真係好欣賞套戲咁...  我記得好細個跟我Uncle去睇戲, 我諗我個時十幾歲大,, 係戲院睇戲偶然都會聽到有人睇到拍晒手... 但自我長大後再去睇戲, 咁多年都無乜呢d事發生.... 所以今日睇呢場戲, 除左戲好睇外, 我同大少都覺得氣氛好正,, 因為一大班人一齊睇戲, 一齊笑, 仲有人拍手叫好叫座,,, 令到成個氣氛都好輕鬆...好好feel... 真係好感謝主賜俾我地係2006年最後既一晚有個咁開心既節目...

大家見唔見到好多黑白人呀??

係帆船酒店兩旁放既煙花, 好難得先影到一幅完整少少既俾你地睇,, 新年快樂!!!

MALL OF EMIRATES - SKI DUBAI 外型

Happy New Year!!!!!!

Happy New Year!!!! 

祝各位朋友身體健康, 心想事成, 日日都開開心心!!!

今日已經係2006最後一日, 回顧返過去呢一年, 你覺得自己有冇進步到呢? 有冇咩得著? 對於自己2006年1月1日曾許下既願望, 有冇實現到呀?  我自己覺得今年係我人生最開心既一年, 因為無論家庭, 事業, 愛情, 友情等都過得非常順利, 而且今年我覺得最開心既就係同左大少一齊... 另外就係去左希臘玩呀!!!  呢個地方係我一直夢寐已求想去左好耐既dream place, 終於俾我去左, 仲日日都玩得好開心 (多謝sandy, sammy & 大少既照顧) 如果唔係你地, 我都唔會咁快有機會去呀!!!  呀, 最緊要多謝我阿爹金錢上既大力支持... love you so much!!!

好啦, 除左回望過去, 仲要迎接將來.... 我係2007年有咩新計劃&願望? 

1.  家人, 朋友身體健康, 平平安安, 事事順利

2. 大少工作順利, 身體健康, 越黎越錫我

3. 希望減肥可以有大躍進既成績 (過去每年都想減肥成功, 不過我睇都幾難, 唔洗成功, 有少少成績我都已經收貨)

4. 希望可以搵到一份更好既工

5. 想人生積極少少, 今年可以真係'的'起心肝學日文

6. 希望自己既EQ可以俾大少感染到再提升高D, 唔好為小事抓狂...

7. 日日都過得開心快樂...

8. 好老土咁講句 - 願世界和平, 少D天災人禍

哈哈.... 其實仲有好多濕碎野, 不過唔講咁多, 攪到好似咁濫咁... 我既新一年計劃&願望大致上就係咁啦...

你地又有D咩新年願望呀? 

呢個係我送俾大少既除夕禮物, 因為佢專門鐘意玩呢D用腦費神既玩意....

但估唔到佢唔洗一個鐘就砌好.... 勁呀!

呢個係大少送俾我既除夕禮物, 我地之前係杜拜搵左好耐呼拉圈都搵唔到邊到有得賣..... 但前幾日, 我地去家樂福買完野, 將架手推車推去車尾放野時, 打開車尾, 我見到呢個呼拉圈, 好興奮咁問 '點解有個呼拉圈既? 嘩, 好駛利呀, 點解搵到既?'   跟住大少呆左兩秒, 就話, '哎吔, 頭先仲記得要洗開你, 轉頭又唔記得, 俾你發現左添..... '  Honey,, 好多謝你咁細心一直記住我想要既野.. 就算只係一個好普通既呼拉圈, 我都好開心, 雖然唔係在你計劃內俾我發現, 但我都好surprise, 好開心呀!!  I LOVE YOU!

大家樂 - 焗豬扒飯

尋日開始, 杜拜呢邊一連放四日假.... 好開心, 大少呢幾日又係完完全全咁屬於我, 係我身邊倍住我...

咁開心既日子, 我地緊係最鐘意入廚房煮新菜式啦.... 尋日就整左焗豬扒飯!

首先, 先炸熟豬扒 & 整定炒飯底! (呢個項目分別由大少負責炸豬扒, 我負責炒海鮮炒飯)

將炒飯平均鋪係焗碗內, 再將炸好豬扒切件排好

另外煮好一個蕃茄洋蔥磨菇汁, 平均咁倒上豬扒上, 再隨喜好加芝士

用150度焗十五分鐘

令芝士溶化及有少少燶既效果, 即可!

又熱又香既焗豬扒飯出爐啦....

好豐富, 好美味既一餐 ^_^

發up瘋.... 廚房vs燒雞!

我發覺個焗爐越黎越好用, 仲正過微波爐呢,, 以前係香港屋企都有焗爐, 但好少用黎整野食, 多數都係焗下蛋糕同曲奇餅咋..依家仲衰, 直程剩係用黎放d無乜用既碗&杯.. 

咁大個女都係近依兩三年先識煲飯, 今年過左黎杜拜先算真係識煮飯..  原來廚房對於一個會入廚既女人黎講係十分重要, 而且廚房既用具亦都係非常講究, 大至一個煲, 一隻獲, 小至一張保鮮紙都唔係求其架!  我依家先深深體會到, 廚房其實同睡房一樣重要! 廚房既大小, 水龍頭既位置, 吊櫃, 碗櫃, 食物櫃等, 每一個設計都唔可以是是單單.... 因為我漸漸發覺, 我入廚房整野仲好似多過入睡房咁?!  明明啱啱先洗完早餐d碗, 咁快又係到洗緊lunch既碗? 轉個頭又洗晚餐既碗?? 有時洗到自己都好似麻木左, 會問下自己, '咦, 我唔係啱啱先洗完一堆碗碟咩, 點解我又係到洗緊既?'  一係就我明明啱啱先切完d蒜頭, 彊絲.. 點解我依家又要再切?? 

所以如果個廚房整得唔好靚, 唔夠就手, 唔夠舒適, 邊個會enjoy成日走入去廚飯呢? 係呢邊地方大, 廚房都算大, 我都係覺得啱啱夠用咋,  香港地方咁細,,, 如果個廚房又細又窄,, 我驚我會適應唔到...

唔知點解今日心情麻麻地, 係咁亂發up瘋!

***********************************************************************************************

之前我買左隻小Size既冰鮮雞返黎, 諗住試下焗雞食,, 因為成日食出面d燒雞好好味, 皮脆肉嫩, 所以我又試下整    初初諗住試玩性質... 點知整左出黎出奇地好味, d肉好嫩口, 連d雞胸都唔'un', 大少又食到'lam lam利'

 
 

燒雞過程.....

登登登登..... 又香又滑既燒雞出爐... 但個皮唔脆, 下次我諗要較高溫d....

再配南瓜湯 & 蒜香炒椰菜...

MSN大地震!!!

唉呀, 今日終於上到MSN啦.... 由前日大地震後, 就上唔到.... 感覺就真係好無助, 平時我一起身同大少食完早餐, 第一件事碗都未執就上MSN架麻,, 呢兩日上唔到... 攪到我好似無左靈魂咁... 朋友們, 我好掛住你地呢!!!  原來除左Internet對於我黎講係好緊要外.. MSN都算係我生命中不能缺少既一樣野.. 佢除左係俾到娛樂我外, 仲好似我既家人咁, 平時唔覺唔覺, 原來有你地係到一齊上網, 就算唔係成日有傾開計, 都無形俾左種安全感我!

雖然呢兩日真係好悶.. 但細心諗, 我都要感謝主... 雖然呢次大地震令到上唔到MSN, 係好慘... 但值得我開心同感恩既係, 好好好好好好好好好好彩我係大少身邊

之前未過黎杜拜, 我地只可以靠MSN傾計同見面.. 有時候網絡唔隱定, MSN唔聽洗, Connect得唔好, 攪到我同大少無辦法好暢順咁傾計時, 我都會痴左線, 所以如果今次呢個"MSN大地震"我係o係香港既話, 仲要唔知佢幾時先好得返, 我諗我會'炆'到傻左!!!!  所以我真係好感謝主, 係意外發生其間, 我同大少係身處同一地方, 同埋我媽咪&台灣D親戚都平安無事, 感謝主!

呢兩日係屋企無野做, 唯有不斷諗新菜式同埋焗蛋糕囉... 發現有左個焗爐真係可以玩多好多野, 好抵玩呀!

焗薯, 無咁肥膩! 但又好好味!!!

Blueberry Cheese Cake

雖然整左兩個Cheese Cake, 但都係失敗!  聽日再試過

New York Cheese Cake - 個賣相好靚, 但味道就太咸, 買錯左cream cheese!

雖然好靚, 但食左兩件都成個掉左

煙三文魚炒飯配焗雞翼

以上所有菜式都係有用到個焗爐黎整架, 所以我同大少講個焗爐真係好抵玩!!!!

Boxing Day! 我的聖誕禮物

今日係Boxing Day... 但大少送俾我既聖誕禮物係24號個日已經拆左啦

...  係呢邊真係無聖誕FEEL.... 除左24號我同大少係屋企煮聖誕大餐, 播下聖誕歌外... 尋日我地約左一個同事出去酒店食聖誕大餐, 但都係無聖誕Feel囉..好似仲少人過平日... 激死!   不過呢位同事送左份聖誕禮物俾我地... 身在外地, 除左收到大少既禮物, 仲有呢位同事既聖誕禮物, 都好surprise... THANKS!!

呢兩日係屋企都比較悶, 因為香港係假期... 香港D朋友都唔洗返工, 出晒街玩,, 都無人同我玩MSN... 你地既聖誕喜悅, 聖誕氣氛, 連我呢邊都感受到呀... 就連我既表弟都同我講, 佢有約, 約左朋友去中環嘉年華玩呀!!!!  我好羨慕呢!!!  大家... 介唔介意聽日正常返工時, 上黎話我知你地既聖誕點樣過呀?  等我都替你地開心下麻..... 

雖然今年唔係香港過聖誕, 但其實數數埋埋, 原來我都收到好多禮物,,, 不過有D係香港無攞過黎, 所以無相俾大家睇... Anyway, 應下節,, Boxing Day,, 拆禮物啦!!!!   同埋藉此多謝送聖誕禮物俾我既朋友... thanksss!!!

第一份聖誕禮物.... from Mrs. Liu (呢個Candle我之前都已經提及過)

第二份聖誕禮物.... from my Daddy (係一條鑽石手鏈, 其實Daddy話呢條手鏈已經包埋除夕, 生日, 情人節, 兒童節等... 叫我唔好再問佢攞禮物喎....heeeeee!!!   OK啦,, 見你送D咁貴種既野俾我, 我07年下半年先再問你攞禮物下 )

第三份聖誕禮物 .... from Cherry (係一件外套)

第四份聖誕禮物 .... from Amy (佢親手自制既麪粉花蛋糕咖啡禮盒)

第五份聖誕禮物 .... from 大少 (多謝你呀.. Honey)

第六份聖誕禮物.... from Elain (係一盒朱古力, 但我鐘意個包裝多D囉... heeee)

我應該無數漏掛,, 如果有朋友係今年有送到聖誕禮物而我又漏左無多謝你, 係到同你say 個SORRY先, 不過我諗應該齊架啦.... 最後... 再一次多謝各位.... especially my Daddy & my Honey...因為你地兩個都係我最愛既人....

XO醬海鮮炒烏冬

前幾日放假, 同大少食左個豐富早餐後, 到三點幾先肚餓... 打開個雪櫃, 好似又無乜材料, 都唔知煮乜好?!  突然間靈機一觸, 廖太之前送左一樽自制XO醬俾我, 咁正既野, 我緊係帶埋過黎杜拜呢邊啦.... 再搵下雪隔有咩剩餘物資,, 有墨丸, 腸仔, 海鮮包, 椰菜等......... 咁就炒我家傳既XO醬海鮮炒烏冬 (點解係家傳? 因為我DADDY平時好鐘意用XO醬炒烏冬我食)

豐富早餐, 磨菇庵列配茄汁豆加牛角包...

XO醬海鮮炒烏冬

材料 :

魚柳 .................... 一條 (切開為小塊)

海鮮包 (青口, 蟹柳粒, 小帶子粒 (係呢邊有得一PACK賣, 如果香港無, 就要自己準備))....... 適量

腸仔 ..................... 一條 (切粒備用)

墨丸 ..................... 四粒 (切粒備用)

烏冬 ..................... 一包

椰菜 ..................... 適量

醃料  : (FOR 魚柳)

鼓油 ................... 少許

麻油 ................... 少許

胡椒粉................. 少許

粟粉 .................. 少許

香草 .................. 少許

調味料 :

豉油 .................... 少許

XO醬 .................. 4 - 5 鐵匙

鹽 ....................... 少許

做法 :

1)  開獲落油煎香魚柳至金黃色 (用慢火煎)

2) 另炒熟海鮮粒, 腸仔粒, 墨丸粒&椰菜, 撈起備用

3) 將烏冬放入魚柳獲內一起炒, 再加入2

4) 加入調味料, 略炒即可. (自己試味)

其實呢個炒烏冬好簡單, 我諗好多朋友可能炒得仲好味過我呢款, 我只係想POST出黎讚下廖太既XO醬好好味.... 但我睇小左佢, 落太多, 攪到辣得滯!!! 但都好好味!!!!

好香口既XO醬海鮮炒烏冬... 估唔到一包烏冬都夠兩個人食喎!

嘩... 好足料, 好多好多既瑤柱係XO醬入面呀! 好好味

我們的聖誕大餐....

MERRY CHRISTMAS !!! MERRY CHRISTMAS!!!  MERRY CHRISTMAS & HAPPY NEW YEAR!!!!

首先多謝有d朋友留言俾我suggest 我揀邊個Menu...

Finally.... 我同大少決定左Menu 4... heeeeee  其實都係自己煮, 不過菜式有少少變動啦...  今個聖誕雖然無乜聖誕氣氛, 但我係香港買左少少飾物過黎呢邊怖置,所以係我地間屋到, 都搵到少少聖誕氣氛既....  另外就係今個聖誕真係好sweet sweet, 因為我同大少兩口子一齊炮製每一道菜式, 感覺真係好開心, 好甜蜜, 我好感謝主賜左呢一個男人俾我.... 因為同你一齊, 感覺真係好舒服, 好開心...  I Love You, Baby..

ok, let's see our Christmas Menu

前菜 : 煙三文魚沙律

湯 : 磨菇海鮮湯

主菜 : 肉眼扒配蕃茄義粉 (配南非紅酒)

甜品 : Ng's Family HOMEMADE 菠芒橙

煙三文魚沙律 (係家樂福買現成一盒沙律菜, 另再買一PACK 煙三文魚, 稍花少少心思舖上碟, 即可)

磨菇海鮮湯 (只係罐頭磨菇湯, 但另加什錦海鮮粒, 內有青口, 帶子, 蟹柳等.... 加左後成個湯香好多, 好有鮮味)

大少托朋友係DUTY FREE買左一枝紅酒... 我平時好少飲酒, 因為酒量唔好, 而且覺得唔好飲, 但呢枝紅酒又幾OK喎, 唔太難入口....  敗畢係無紅酒杯, 逼住用可樂杯黎享用囉... 別有一番風味呢!

肉眼扒配蕃茄義粉 (每次煎扒都係由大少操刀, 次次都煎得好好味,,, 義粉係我request, 唔知點解勁想食義粉... Yummy!)

Ng's Family HOMEMADE 菠芒橙 (大少好鐘意將D生果切粒, 撈埋一齊, 用spoon拔黎食, 今次簡簡單單將芒果, 橙切粒, 另外再加菠蘿片... 最攪笑係三種生果都係同一隻色.. )

食完呢餐聖誕大餐, 我地兩個都好滿足咁坐係sofa到傾計,,, 大少仲好古惑咁係唔知邊到潛左份聖誕禮物俾我............  好開心,, 所以我諗過時過節花少少心思係屋企煮飯都幾好, 食完又可以即刻攬住溫馨下, 唔洗理人....