蕃茄魚柳煮麪條

其實我係一個好懶既人... 好多時整lunch俾大少食我都係以快、靚、正為原則!

何謂快、靚、正?  就係以最少既功夫, 最短既時間做出大少以為我花左好多心機既野俾佢食,,, 咁就為知VERY GOOD 啦 (請用乜太語氣讀出!)

依家既我, 好多時都好懶,, 朝早八點煮完早餐俾大少食, 等埋佢返工, 我就會入返房訓覺.... 有時訓到十二點起身,, 有時訓到十二點半先起身,, 有時仲誇張!! 十二點九個字先識醒!  但大少放lunch時間係1:00p.m., 加埋佢由公司行返黎約兩三個字, 我要係一點三四個字煮好個lunch 俾佢 ..

一'Mark' 大眼,, 見到時間

非常緊迫, 朝早食完D早餐碟仲未洗, 又要預備黎緊呢餐,,

係短短約半個鐘頭裡面, 我要諗煮乜食, 將材料解凍, 再將朝早D碟&獲洗乾淨... 再洗今餐既餸, 又要切, 又要醃! 所以... 我晏晝好少炒餸食飯,,, 多數都係碟頭飯, 碟頭麪攪掂佢... 我唔係想誇獎自己有幾咁本事... (其實都有少少既...heeeeee  ) 但老實講,, 係撞啱大少易服待, 而且碟頭飯係佢既至愛... 我先可以咁容易過關...

所以.. 大家成日都會見我有炒飯, 炒麪呀, 煮義粉, 食Pizza 等既lunch

今次, 我要介紹呢個 -

蕃茄魚柳煮麪條

材料 : (二人份量)

Tagliatelle 麪條 ................  十個

龍俐柳 .............................  兩塊 (約腳板咁長)

磨菇 ..............................  四至五粒 (切片備用)

蒜頭 .............................  少許 (for 爆香獲)

蕃茄 ............................ 兩大個 (切細粒備用)

蛋 ............................... 1 隻 (打勻備用)

醃料 for 龍俐柳 :

將龍俐柳切片, 醃半小時備用

生抽 ........  約3 湯匙; 麻油 .......... 少許; 黑糊椒粉 ........ 少許; 糖 ........ 少許 ; 紹興酒 .....少許

調味料:

蕃茄醬 ............ 3湯匙

糖 ............ 3茶匙; 鹽 ........... 1 茶匙, 黑糊椒粉 ......... 少許

做法 :

1) 先煲滾熱水加少許油&鹽中火煮熟麪條 (約七分鐘), 自己試下咬落去唔太硬便可熄火焗兩分鐘, 再放進筲基用凍水沖洗後備用 (用凍水沖洗係令麪條降溫以致唔會再變淋)

2) 開獲落油待滾, 用蒜頭爆香獲再放入魚柳(連腌料汁), 用大火略煎至金黃再收細火慢煎, 同時倒入磨菇略&蕃茄粒略炒, 並倒入蕃茄醬汁, 加少許水, 蓋獲蓋稍將蕃茄煮林...(約2分鐘)

3) 將麪條回獲炒. 同時加入剩餘之調味料略炒至撈勻, 將已攪勻之雞蛋倒入獲內, 手快炒勻...最後,  開生粉水埋獻汁, 試味後, 即可上碟!

其實呢款炒義粉同之前介紹過既蒜香魚柳磨菇煮麪係大致上一樣, 只係醬汁唔同,,, 蕃茄味酸酸甜甜好開胃, 而且將蕃茄切粒食落清新有口感! 不妨一試.... (教得唔好, 唔好見怪!!)