瑤柱皮蛋冬菇粉絲蒸水蛋

估唔到大少一個瑤柱皮蛋冬菇粉絲蒸蛋吸引左咁多blog友既留意....仲好多人都想睇下點樣整添!

大少, 真係佩服你既魔力, 甘拜下風,,,我唔敢再話你做乜煮埋D咁奇怪既餸!!

話時話, 我真係未食過呢款蒸水蛋.... 大少話佢阿媽平時係咁煮, 佢係街到都食過..... 恕我愚昧... 真係未食過... 你地有冇人試過呀?

其實今次呢個蒸蛋大少都係第一次整.... 雖然味道唔錯,, 但可能可以整得更好,,, 大家可以當作參考,, 覺得唔對路, 就以自己既經驗調節啦

瑤柱皮蛋冬菇粉絲蒸水蛋

材料 : (二人份)

雞蛋 ........  兩隻大size (打勻) (用兩隻蛋就會似我地尋日食個款, 蛋同料差唔多高; 但用四隻蛋就會蛋蓋過料, 賣相就會好似普通蒸水蛋咁... 視乎個人喜好)

皮蛋 ........  一隻 (切粒) (咸蛋都得, 視乎個人喜好)

瑤柱 ........ 按個人喜好 (用熱水浸林)

冬菇 ........ 按個人喜好 (用熱水浸軟, 去掟, 切粒)

粉絲 ........  按個人喜好 (用水浸林, 但不要用熱水, 否則太林容易變糊)

雞湯 ........ 200克 (若用四隻蛋就用大約400克 = 一罐史雲生雞湯)

蝦米都可以用, 只係我地屋企無蝦米!

做法 :

先預備燒一獲水, 待滾

1 ) 將蛋打勻, 再倒入雞湯攪勻, 備用

2) 分別將粉絲, 冬菇, 瑤柱, 皮蛋鋪係碟上 (粉絲鋪底)

3) 將1)慢慢倒入2碟, 撥走表面既泡泡..(可隨意加蔥粒/芫茜)

4) 放入已滾獲到用中火蒸5分鐘, 熄火, 蓋住焗2分鐘即可! (如用四隻蛋則需較長時間蒸, 約7分鐘!)

希望大家會鐘意啦!