幸福小女人- Diana: 4月 2007

2007年4月30日星期一

各式 Markets @ Abu Dhabi

上星期六, 約埋同事一齊去Abu Dhabi o既Fish Market & Vegetable Market, 你地之前見到超大隻o既蝦, 就係o係呢個Fish Market買架啦.... o黎左咁耐, 都無行過... 今次我地都要入下貨!!

呢到o既街市同香港有少少唔同, 如果想買D普通餸菜, 去家樂福或者某大型Supermarket就會有齊! 但如果想揀又多種類又新鮮既海鮮... 就要去Fish Market 啦!!

呢到既Fish Market好大, 但全部都係一檔檔魚檔, 感覺好似一個大屠場... 都幾恐怖! 首先去左Fish Market 買左1 kg 大蝦, 諗住黎緊星期四攪House Warming Party, 整大蝦天婦羅俾大家食!!

我本身對魚類係一D認識都無, 剩係知紅衫魚有條紅線係身到,, 黎到呢到,, 更加唔知乜魚打乜魚(寫英文更加唔識分!)... 但我係魚市場內.. 好肯定見到有鯊魚賣 (右上角張相).. 我無興趣買黎食, 因為我見到都怕怕!!

另外都買左一條超大墨魚... 我地兩個人根本食唔晒, 分左一半俾大少同事一齊食...

再o黎去Vegetable Market, 同Fish Market係兩個地方, 雖然都近, 但都要揸車去.. 係咪好攪笑呢, 買個餸都要走幾場~

呢到D生果真係多款過Supermarket好多, 而且都比較新鮮.... 我地係到買左一個東瓜, 一籃橙、蕃茄、翠玉瓜... 由於太多, 大部份都俾左一半同事一齊享用, 費事食唔晒!

最後一站,, 去左花墟... 雖然D植物無香港咁多款式, 又無咁靚...但為左增添新居o既生氣.. 我都揀左兩盤返去種下... (希望唔好咁快俾我玩死!!)

呢一盤係同事Mandy送俾我既入伙禮,,heeeeeeeeeeeeeeeeee..佢幫我種到好靚先送過o黎! 白掌呀白掌, 希望你o黎到唔好咁快瓜柴,, 要堅強咁生活落去呀!!!

呢盤係我揀既粉紅紫羅蘭,, 返黎第二日已經開多一朵花啦~~ 好開心!! (黎緊有第4朵花冧出緊啦... )

呢盤係放係大少工作枱上o既...........(唔知係咩名, 大家可唔可以話我??)

我每日既生活, 又多左樣野做啦.... 就係要照顧你三隻野.. 你地要乖乖地咁成長, 唔好咁快死呀!!!

2007年4月29日星期日

人見人愛的蛋糕仔

無得上網既日子, 係屋企真係好悶....

幸好家中電視偶有一d攪笑西方劇集作伴, 否則… 我會發毛!

呢幾日呢到天氣熱到不得了, 試過一次自己係屋企行返公司上網, 雖然短短十幾分鐘路程, 足以令我溶化... 唔想大少工作其間突登走出黎車我.. 我唯有留係屋企作獨居老人!

每日朝早煮完早餐, 等大少返工後, 我就會睇電視, 洗衫, 熨衫, 掠衫, 再煮Lunch, 跟住下晝我就會好free架啦~~

除左訓晏覺外, 我最近就會係屋企玩個新焗爐! 前幾日, 上網係大少奶個BLOG到抄抵左做一口蛋糕仔既recipe, 希望今次會成功!

做好麵糊前, 先排好一個個紙兜…

做蛋糕, set好D架部先!! (次次都整到好似打仗咁!)

before baking,用唧咀唧到六七成滿....

焗緊啦.... 睇住佢漲卜卜,, 好開心呀~~

出爐啦~~~

我TOTAL 焗左兩盤五十幾隻, 第一盤按原定時間焗, 就好軟熟! 第二盤焗多左十五分鐘... 就變得好脆身,, 兩種食法都好味!! 感謝主.... 成功左lu!!

送左一大半俾大少d同事食, 個個都話好味,, 可能大家都掛念香港既蛋糕仔....

一口蛋糕仔食譜 Recipe (我由大少奶到COPY, 大少奶係撰寫自小魚仔, 點都好, 要唔該晒佢兩位!)

材料 ( 50 - 60 個份量 )

無鹽牛油 ( 室温 ) 150 克

砂糖 12 克

蛋黃 3 個

蛋白 3 個

砂糖 102 克

低筋粉 ( 辥好 ) 126 克

發粉 1/2 茶匙

小紙杯模 ~ 適量

做法 :

(1) 首先預熱焗爐 180 度火 / 15 分鐘及低筋粉 + 發粉 ( 薛好 ) ~ 備用。

(2) 室温牛油 + 砂糖 (12克) 放入缸內用 (1號速) 打至鬆發。

(3) 加入蛋黄 ( 分2-3次加入 ) 繼續攪拌至光滑。

(4) 另外將蛋白放入缸內用 (1號速) 打至發泡，加入砂糖 (102克) 分2-3次加入打至企身。

(5) 用膠挖將蛋黃糊分2-3次加入蛋白糊內輕輕攪拌勻。

(6) 加入巳薛好低筋粉 + 發粉落去攪拌勻。

(7) 將麵糊放入唧袋內，然後唧落紙杯仔內 (6-7成滿) ，再入焗爐 (中層) 180度 / 15-20 分鐘。

2007年4月26日星期四

Healthy Meal

最近因搬屋繁忙, 故多數都出街食飯....

出街食除左唔抵食外, 另一樣至命點係容易食過多而且又肥又唔健康~

呢兩日無得上網, 唯有乖乖留在家中鑽研新菜式!

午餐 : 煙三文魚 & 吞拿魚沙律三文治 + 焗大磨菇兩件配多隻蕃茄鑲粟米!

餐飲 : 鮮榨西柚橙一杯

大菇用Salt , 黑椒作調味.... 其中一隻更加上Wasabi, 味道又鮮又辣... 味道幾特別架 !! (呢個食法係學我Best Friend Cherry整架!!) 好好味呢!! 放入焗爐用180度火焗15 MINS... 攪掂! Healthy Meal

另一日既午餐....

我選用芫茜, 豆腐, 蝦仁... 隨意炒左一碟餸出黎... 味道香口清淡,, 送飯唔錯呢!

將蝦仁用鹽, 黑椒, 麻油略醃30MINS,,

蒜頭爆香獲炒蝦仁, 加入切粒軟豆腐,, 用獲剷壓碎, 炒至豆腐變金黃,, 稍作調味, 最後加入芫茜略炒, 即可!

方便又健康既午餐! 大家不妨試下~~

家有喜事!

今日係我堂家姐既結婚大日子... 原本未返黎杜之前講好左我會26再返香港參加佢既婚禮... 但家姐話遲D會補擺酒, 叫我唔好浪費機票錢, 到時擺酒先再返去啦...

尋晚, 我打電話俾家姐, 知道佢原本想簡簡單單註冊完同家人食餐飯就算, 點知依家攪到都好似全套做晒咁,, 搵左人SET頭化妝&租左婚紗著... 全家大大小小總動員都會出席... 晚上更擺左幾圍同親戚朋友食飯慶祝….

我同家姐雖然唔係親生姊妹.... 但我地由細到大都算係相依唯命... 因為我地都係單身家庭長大, 父母都無暇照顧我地... 細細個都係自己攪掂自己... 所以, 我地算係最清楚對方既一舉一動! 細個時, 家姐唔鐘意帶我出街, 唔鐘意同我玩, 因為嫌我麻煩而且唔聽話...

但到我大個後, 我地距離拉近左, 我地經常都會行街食飯, 又會係房互相傾訴心事.. 大家成日都會傾到抱膝痛哭....

家姐無拍拖多年... 經常會同我講,, 珊... 你大個女啦,, 幾時結婚呀? 你要乖D, 唔好再成日發小姐脾氣,, 唔好咁大洗啦... balbalabl..... 我諗我地屋企黎緊可以辦到喜事既人, 都係你,, 你快D結婚生個BB俾我.... 我成日都會答佢, 得啦得啦... 可能有一日你會結婚先過我呢!

今日, 終於實現左!! 表面上好似好自然既事,, 但我開心得從心到流出眼淚... 家姐,, 我真係好希望好希望你永遠幸福快樂,, 唔洗再成日一個人面對任何問題........

另一件事令我喊到收唔到聲既係, 我今日打俾姑姐, 問佢今日情況如何, 一切順利嗎? 大家聽到我打返去都好開心... 我自小係家中都係一個多咀妹, 有我係到就會有歡樂,, 係家人面前,, 我就係一個俾Daddy寵壞既大小姐, 大家都會好就我好錫我.... 今日咁開心既日子,, 我竟然無出席到, 我好後悔!! 亦都好掛住我所有既屋企人.. 尤其我Daddy...... 我真係好掛住你!