彈糕

搓包搓到癲左!!! 原因係我條氣依家唔上唔落,, 似成功又非成功既感覺令我好想搵出失敗既原因... 所以我不停試完又試, 做完又做~

跟左好多唔同食譜都做唔到一個可以攞去請人食既包, 令到我好down!!!   唯有不停去睇睇別人既blog,, 吸收更多搓包知識...   最後俾我發現Cass 既彈彈波吐司... 聲稱超soft & 做法簡單!!  所以尋晚做完基本吐司都忍唔住要再做埋呢個彈彈波吐司~

但最諷刺既係... 呢個包唔洗搓到起薄膜, 唔洗落老麵, 唔洗種中, 唔洗一定要用天然酵母.. 都已經做到好鬆軟,, 好好味既包包!!! 真係唔到你唔服~~

終於明白有時候,,付出多收獲唔一定會多.. 相反付出少,, 反而有驚喜!! (反面教材~heee)

我既彈彈波吐司出場啦!!! (我有個朋友打牌時, 唔知點解好鐘意講 "Pu 你阿麼, 彈彈波" ! 莫非佢一早知有呢隻彈彈波吐司??)

今朝一早起身, 牙都未擦就走去摸下D包仲軟唔軟???  嘩.. 一切..真係軟到切既時候, 塊包都企唔隱, 彎晒腰呀!!!

今朝即時煎塊餐肉蛋夾黎食先~~  好正呀!! 大少已經落order話以後唔買出面d方包,, 只定要食呢隻啊!

又軟熟,, 又可以隨個人喜好切厚薄,,, 真係好好味!!! 最緊要係.. 呢個包真係好簡單,, 好啱初學者又唔想失敗既人做呀~ 

雖然搵到呢個不敗彈彈波食譜,, 但我係唔會放棄其他麵包架!! 我一定要學到成功為止~ 加油加油!!

************************************************************************

原本唔想整蘿蔔糕,, 但見到條蘿蔔咁長咁粗,, 好興奮呀!!!  即刻買左返屋企先~

係無乜信心會做到既情況底下,, 又好似成功咁俾我做左兩底!!! 聞落仲好香添~ (未蒸前!!)

點知一蒸就出事... D糕係咁出水.. 越蒸越唔對路!! 唉... 我都知難逃失敗既一劫!

尋日唔想俾大家見到既... 咪就係佢囉!!

唔係一件件既蘿蔔糕! 係一pat pat既蘿蔔糕,, 唔知係咪d蘿蔔出得太多水.... 濕到阿媽都唔認得! 好彩味道尚可... 係中東地方無得食,, 頂住擋先啦!!

呢樣失敗之作想做多次都唔得,, 因為我係香港帶得一包粘米粉過黎... 已經用晒啦!! 唉~

你地話.. 連翻多次失敗既打擊,, 我又點會唔down至得!!

基本吐司

前兩日又想搓包,, 一心起身入廚房動工先發現無晒高筋粉... 心情即時down晒!!!

係依到唔容易買高筋粉,, 好多時賣既麵粉都係寫住All Purpose/Plain Flour...以前試過買Bread flour, 但做出黎既效果都係唔理想!!!  最後搵到日本既高粉, 價錢雖然貴三倍, 但都買黎試下... 果然,, 真係唔同D!  我下次返香港既target就係抬幾斤麵粉過黎..哈~

完成最後發酵,, 好肥嘟嘟呀!!!!

焗-ing!  最近無論做麵包, 做蛋糕 or 中式點心都唔成功!!! 所以做呢個包時都幾大壓力...

出爐啦... 唔明白點解我做既吐司永遠都發得唔高... 唔似一塊吐司... 個樣好似普通香蕉蛋糕咁!!!

唔敢話自己個麵包成功.. 只可以話, 有進步!! 

九唔塔八餐!!!!!  一口氣焗左兩個吐司, 另一款聽日先post!  攪完一輪, 無晒力氣再去煮飯!  又迫大少食麵包當晚飯... 哈~ 我越黎越唔人道,, 成日迫佢食埋呢d野!!! 

打左格仔個碟又係另一'杰'作 (杰係 = 禍左既作品) .. 有機會再POST俾大家睇~

個包包皮焗到好濃... 硬到可以扑死狗! 哈~

終於焗到一個吐司係放多一晚都仲軟熟!! 我要繼續努力啊~

唔知點解焗完D麵包雖然唔難食.. 但仍然有少少失落感!! 覺得自己好失敗...  開始有D懷疑自己係咪真係無乜天份做麵包蛋糕?

泰.車 (太多車)

上星期五又去Hilton食泰式burnch buffet!!  今次想去既原因係我同大少都好掛住佢既點心... 雖然得四款, 但起碼似返正宗中國點心!!

環境無乜特別,, 但呢棧燈都幾靚..  好圓啊!!

話晒係泰國餐店,, 裝修同傢俬擺設都好有泰國風味!

好似每位68dhs (約140港紙), 送一杯鮮雜果汁! 係呢到既酒店食Brunch buffet.. 以呢個價錢黎講係非常抵食!!!

今次我主力係食點心!!  d 皮唔厚架... 嗒得杯落~

又係點心 + 蝦餅!!

仲有佢地有一隻泰式炒牛肉,, 辣辣地..好野味!!! 

泰式沙律,, 腰果配一條條唔知係乜既野... 好好味!! 想偷d返屋企當snack...haaaaa

當然唔少得,, 係到買要好貴好貴既木瓜+芒果啦!! 我食左兩大碟~ (最開心係食到甜木瓜!!) 

同事M笑淫淫咁問我..仲乜係咁chur d 木瓜食.. 我話: 如果以我咁既年紀食木瓜仲有效... 幾貴一個我都要日日食呀!!!!

大少至愛既泰式湯麵... 不過呢到既水準就同泰國差好遠!!!  淡而無味~

大少今日同我講可能下個月要去泰國開會啊!!! 我心裡當然暗暗歡喜啦... 雖然佢講到明去到要做野,, 無乜時間玩... 但我都好想去呀!! 起碼真係可以食下泰菜, 做下SPA都已經好正啦!!!!   

希望到時佢無咁忙..可以出席個meeting 啦!

*************************************************************************

俾大家睇下阿布達比夜晚既街道.... 由於呢到係勁多車,, 幾乎每個家庭都有一架!

但係比較舊式既樓係無停車場供應.. 只有大量既街位!! 所以,, 只要d人見到有一個空間係唔阻人, 唔會俾車撞到,, 佢地都會攞黎泊車! 有d 四驅車仲會剷上行人路添~

唔止咁.. Double parking 係好常見!! 好心既人會留個電話號碼係車, 有咩事可以Call佢, 但絶大部人都係唔好心,, 諗住自己好早走,, 所以一於少理.. 吹咩!!

我地真係試過泊係某個位.. 然後落車買D野.. 點知返轉頭架車就俾人頂住左!! 仲要係四面受敵, 根本出唔到去~ 最後不停響按, 盼望知情者回頭... 點知都等左成半個鐘先咁啱有人攞車, 我地先逃出生天!!!!!!!!

有時都唔怪得d人咁離譜!  我地以前都試過搵車位搵成半個鐘... 真係仲難過繁忙時間係地鐵搵位坐~

好彩依家我地棟大廈有Carpark.. 如果唔係.. 一到大少放工時間, 我就要好似獵犬咁係屋企望落街睇下邊到有位, 即時報串!!!

另有目的

哈~ 除左義粉外,, 我平時好少煮西餐食! 一來唔係好識煮, 二來我唔太鐘意食豬/牛/羊..

但上星期我打破一貫作風,, 連大少都估我唔到,, 返黎見到有扒食.. 嚇左一跳呢!

不過,, 今次煮西餐其實係另有目的~

原因一:

呢盒田螺放左係冰格已經好耐啦,, 4月到期, 趁仲記得,, 啦啦聲攪掂佢! 

原因二 :

d薯仔俾我放到出水咁濟,, 再唔食又係浪費... 所以用黎做芝士煙三文魚焗薯!

第一次自家焗薯,, 用200度焗左45-50分鐘, 味道不俗!! 

原因三 :

係香港買左一罐龍蝦罐頭湯過黎,, 成日心思思想飲.. 但同平時既中餐又唔夾,, 今次係時候啦!!

就係以上三個原因,, 呢餐西餐就誕生左啦~~

羊架用鹽&香草略醃, 用石紙包住以200-220度焗25mins...即可!!! 效果一d都唔'un'.. 啱啱好呀~

西蘭花+西芹就咁用蒜頭加少少鹽炒香已經好好味啦!!!

好開心!!! 又清左雪櫃裡某一堆食物..  任務成功!!!!

代價!

好不容易先跑完45mins...

屋企個club house,, 永遠去都唔會多過兩個人係到玩...上面呢部跑步機係我專用咁濟!

冬天雖然未過, 但我已經增磅了不少!!! 每次冬天都逃唔過增磅既事實~ (灰ing)

究竟係冬天既食物特別容易令人發胖? 定係每年過完生日, 就要接受年紀增長而令新陳代謝減慢既殘酷事實?

為左唔好再令自己暴肥落去,, 就算一萬個不願意,, 我又要keep住每日去跑步!!!! 

好多人話做運動會令人開心, 做運動會上癮, 做運動會好訓d, 做運動會健康d..etc

我既感覺係... 做運動無乜令我開心左, 亦唔會上癮, 只要我唔訓晏覺, 個晚必定會好好訓, 唯一既好處... 我諗只係令我個心覺得好d, 無咁大罪惡感!

做任何野都要付出代價!!!  我依家開始要努力還債啦...嗚~~

再接再勵-芝麻包

由於有"老麵"既存在, 加上o個團火燒得正盛, 今日我又挑戰搓包子!

Today 芝麻包是也~~

今次好小心咁量度每樣份量, 真係一樣也不能錯!!! 而且係發酵個部份都特別小心... 不時Check住溫度夠唔夠30-38度...真係當佢仔咁照顧! 

預備要焗啦~~  (巧緊張呀!! 請用國語讀出)

噔噔噔噔.....  今次跟曾美子既書做呢個織物芝麻包!!  你地覺得如何呢??

Total 做左兩隻大, 三隻細! 大少放公返黎時啱啱焗好... 佢一開門已經話聞到麵包香啊!!!

織物包好靚呀... 平時幫自己扎'賓辮'就好容易.. 但同麵包織, 竟然企左係到諗左好耐先織到!! 

今晚無煮飯... 因為今日係Happy Thursday, 無mood煮飯.. 加上我太肚餓,,等唔切大少返就煮左個米粉食!! 所以呢堆包包就變成大少既晚餐... 佢一口氣食左兩大隻啊~~ 好彩佢無怪我唔煮飯,, 仲食得好enjoy...話勁好味!! heeee

餅神Vanlily ... 你睇下我今次有冇少少少少進步呀??

其實..  食到一個新鮮出爐既包包..真係一件好幸福既事!!  我要努力努力~