開始西柚煙肉減肥餐

我諗好多朋友都聽過呢個西柚煙肉減肥餐單.... 自我去年仲返緊寫字樓工既時候, 呢個餐單已經流傳已久.... 而我身邊有好多同事朋友不斷紛紛試著呢個餐單.... 當中, 大部份人都係成功,, 只係.. 減得多少既差別...

我自己一直都無試呢個餐,, 原因係... 我唔係太鐘意食煙肉... 而且我係麪包發燒友... 一日可以三餐都食包.. 二黎我成日都覺得, 有冇咁神奇呀, 剩係唔食所有澱粉質&糖既野, 就可以係十二日減十磅?

其實之前我有同事食緊時, 我都有諗過一齊食... 亦都係百佳買埋煙肉返屋企... 點知一日拖一日... 我只有lunch個餐有食到個半個西柚 (因為食緊個位同事每日三餐都要食半個西柚.. 所以晏晝佢會將另一伴西柚俾左我食)... 其他我都無跟, 煙肉仲擺到過晒期添..

今次點解肯'的'起心肝要減肥呢?  大家都知我過左黎, 食足三餐, 每日都好豐富...  加上我又無乜野做,, 頂多都係洗碗熨衫外, 都無乜運動量.... 唔肥有鬼咩!  我係一個只會口講好驚, 但又唔去行動既人....只會係到嘈,, 死啦, 死啦,, 好肥呀,, 唔制呀.. 點解呀... 唔開心呀... 大少見我咁既狀況... 一早已經話倍我一齊減, 一齊食清D... 但每當美食當前... 我點忍? 

直到上個禮拜有個同事係香港過左黎... 佢就係其中一個

西柚煙肉餐既長期擁戴者... 我地又講開呢個減肥餐... 大少就好有興趣去試下.. 究竟係咪日日食肉... 而且係又可以用牛油煎, 又可以任食沙律醬既情況下都可以瘦... 所以佢不斷說服我叫我不如試下...

但我死都唔肯放棄我美味既麪包、蛋糕、米飯 etc....

大少不斷用好多利誘去誘惑我參與 ... 但我依然十萬個不願意... 不過我知佢係用心良苦.. 佢知我係一個只會係到唔開心, 係到叫, 係到嘈既人.. 佢唔想見我唔開心, 所以先一直係到'乙水' 我一齊減...

最後.. 我俾佢打動到... 12日姐... 眨下眼就過... 就忍下啦... 因為我知如果我再咁肥... 二月返香港見到D親戚朋友, 個個都話我肥左好多時.. 我會仲唔開心........所以.. 尋日, 我地就決定左1月15號開始個西柚煙肉減肥餐!

尋日臨別秋波.. 我地最後衝刺.... 夜晚餐飯煮左三杯雞, 仲有我地兩個都超喜愛既煙三文魚海鮮炒飯!  同場加映係十一點臨半個鐘時'隊'埋一個我尋日焗既雪芳蛋糕....又食左幾粒朱古力....

美食呀美食....暫別12 日啦... 我會好掛住你地架!!!!!

希望大家多多鼓勵我... 督促我...