蒜香魚柳磨菇煮麪條

首先, 我要係到多謝每一位時常伴我左右既Blog 友,, 因為你地... 令我一個人身處外地都唔會覺得孤單... 如果唔係過左黎杜拜呢邊, 我都未必有機會去建立Yahoo Blog... 無諗過係到都可以識到一班來自唔同地方朋友..大家互相分享所見所聞... 雖然大家素未謀面.. 但心靈上卻互相連繫著... 係我唔舒服既呢幾日, 更加體會到大家既關懷... 呢樣野真係感到好感動... 我相信人既本性係充滿愛.. 我會好好珍惜同大家既綠份.. 希望以後我地可以繼續彼此互相鼓勵, 互相睇住大家成長啦.. (好似好肉麻咁.. 但係呢D係我既真心話... )

*****************************************************************************************

呢幾日同菲滋摶鬥.. 攪到我無晒胃口不特止, 連心情都欠奉... 大少連繼續幾日叫我出去行下街, 去supermarket買下餸, 我都唔肯去... 唔知點解, 唔想落街

前日叫大少去屋企附近買阿拉伯烤包... 呢隻烤包有D似印度烤包..但食落口就完全兩回事... 前者基本上係一塊麪包, 後者係有少少似薄餅,, 比較油...

呢種阿拉伯烤包好抵食, 一大塊只係0.75DHS, 相等HK$2到... 即叫即整,, 熱辣辣買返黎又香又軟熟... 加擦埋牛油, 無得頂! 係我咁唔想食熱野既時候, 呢個包係我其中一樣想食既野....

除左烤包, 我自己整左碟沙律食, 又煮左碟意粉俾大少食 (呢個義粉好好味,, recipe係下面...)

 
 

尋晚做整左菜飯, 雲耳冬菇炆雞, 蒜片炒菜.... 整菜飯係想增加自己食慾... 但最後食到一半都無心機再食... 太痛啦!!

以下呢個義粉係我自己隨意煮出黎, 無睇任何recipe, 只係用屋企剩餘物資再加我隨意既配答煮出黎... 我只係煮左大少既份量,, 但出黎效果異常好味... 後悔無煮多D自己又食... anyway,, 想同大家分享下, 有興趣可以試下!

我改個名為 "蒜香魚柳磨菇煮麪條"

之前買左呢隻新既麪條.. 比一般義粉較闊&扁身... 食落較有彈性

材料 : (一人份量)

Tagliatelle 麪條 ................  四至五個

龍俐柳 .............................  一塊 (約腳板咁長)

洋蔥 ...............................  半個 (切條備用)

磨菇 ..............................  四至五粒 (切片備用)

蒜頭 .............................  六至七粒 (切超細粒, 但又未去到蓉)

醃料 for 龍俐柳 :

將龍俐柳切片, 醃半小時備用

生抽 ........  約3 湯匙; 麻油 .......... 少許; 黑糊椒粉 ........ 少許; 糖 ........ 少許 ; 紹興酒 .....少許

調味料:

鹽 ........... 1茶匙; 美極鼓油 .............. 三四滴; 牛油 ............. 一小片

做法 :

1) 先煲滾熱水加少許油&鹽中火煮熟麪條 (約七分鐘), 自己試下咬落去唔太硬便可熄火焗兩分鐘, 再放進筲基用凍水沖洗後備用 (用凍水沖洗係令麪條降溫以致唔會再變淋)

2) 開獲落油待滾, 用蒜頭爆香獲再放入魚柳(連腌料汁), 用大火略煎至金黃再收細火慢煎, 同時倒入洋蔥及磨菇略炒... 加少少水後蓋上蓋待洋蔥煮淋...(約3-4分鐘)

3) 將麪條回獲炒. 同時加入調味料 (牛油都係呢個時候加入) 略炒至撈勻, 開生粉水埋獻汁, 試味後, 即可上碟!