生日 --- 多謝各位, 多謝DARLING (1)

多謝,, 多謝.... 多謝各方好友既祝賀呀!!!!  雖然身不在港, 但都 feel 到你地俾我既溫暖呀!!!! 

開心死我啦!!!  多謝晒....

最開心係大少真係超好呀,, 由尋日開始, 你已經不停係廚房攪呢樣攪個樣.... 原來就係親手整一個生日蛋糕俾我呀...

  多謝呀... 今日正日, 已經急不及待切黎食.... 超好味!! 之前一路整cheese cake都失敗, 整到我都無心機整啦... 但你一直都無放棄,  最後買左一隻寫明cheese cake cream cheese spread黎整, 今次終於成功啦... 正過出街買個d... 你真係好叻呀.. Darling !!!!

除左大少自己獨力整左個生日蛋糕俾我外, 我地倆口子又係到整麪包,,, 但一開始整舊麪粉就出左問題,, 搓極都黏到死, 痴到成隻手都係粉,,, 搓多幾搓我就放棄左, pass左俾大少繼續同舊麪粉摶鬥.... (我自己出左去揸指甲油..heeee)

過左一陣, 我入返廚房問大少, 舊麪粉點呀, 佢就話有進展啦,,, 似返舊正常麪粉啦... 我睇下, "咦, 又係喎, 好似又OK喎.... " 跟住我就一路做軍師咁叫大少要點點點, 點點點.....   經過一輪, 我地既麪包終於成功出爐啦... 我自己覺得好味過街食個D呀... haaaaa  Darling, 我真係覺得你好勁, 每次當我覺得絕望或無助時, 你都會幫我收搭手尾, 然後再俾返D驚喜我....  I Love U !!!

餐蛋包, 餐蛋波蘿包, 波蘿包 (Before Baking)

焗緊啦, 變色啦!!!

燶左少少, 但好脆, 好好味呢!!!!

腸腸包

波蘿包

餐肉波蘿包 (獨家架!)

我地既製成品呀....

另外, 大少仲好有心思咁由尋晚臨訓前一刻, 一路俾驚喜我俾到今朝....  攪到我臨訓前又笑唔埋口, 未完全訓醒都笑醒.....

話說尋日因為有同事係HK過黎, 我地要出杜拜接佢地,,, 攪到成半夜點幾兩點先返到屋企... 返到屋企又見叱咤DOWNLOAD完左, 我又想睇喎, 我大少緊係好好咁就晒我話倍我睇啦.. 我地睇到差唔多四點, 我終於捱唔住話要訓,,, 當我地熄晒燈訓時, 我突然感覺張被入面好似有舊野咁,,, 摸摸下, 再望真d... 原來係一隻hello kitty公仔.... 好surprise 呀, 因為之前我講過想買一隻Kitty 公仔, 但一直以黎覺得咁大個人仲買公仔好似好'晒'錢咁... 但估唔到大少一直都會記住我講過鐘意D乜... 然後自己靜靜去買.... 我見到隻公仔, 好開心... 雖然唔係咩好貴重既禮物... 但我真係好開心,, 而且好surprise呀!!  我隨即好有FEEL咁幫HELLO KITTY改左個名叫 " Tee Tee" (取自KITTY既尾音), 我依家有個Dee Dee, 又有個Tee Tee, 我地一家三口好開心呀!!!

家庭照呀!

Hello,,  我叫Tee Tee Ng, 我有個好爸爸, 有個好媽媽,, 我地一家三口樂也融融..